即使又有一批IPO重啟，吸走部分熱錢，但A股已完全唔受影響，滬港通前升到有點自動波，昨日滬綜指突破2,300點水平，而前日狂升568點的港股，完全無意放生一班淡友，尋日僅微跌20點，收25,297點，主板成交862億元。

除非中央出招刺激樓市及加大基建投資，否則鋼鐵業難脫困境。(資料圖片)

太陽日誌

除息的中移（00941）依然保住紅底股身份，收100.5元，升0.3%，托市的重任落在中石油（00857）及兩隻內險股身上，國壽（02628）及平保（02318）分別升2.8%及1.4%。

近幾日可見，升浪由中資電訊股、內銀股及本地地產股，再到尋日的內險股，大孖沙手上籌碼，在唔同板塊之間快速轉換，要捉到每日手影極為困難，但卻可大致看到，他們買貨心態還是極為審慎，只追業績能見度相對較高、過去兩年落後、大市值、低PE的股份。相反，市場上的中型股及二三線，幾乎全無炒味，經驗話畀筆者聽，個市距離全民皆股，仲有好一段距離。

恒指目標25700

今浪個市到底可以升到邊度？美國金融海嘯及歐債危機之下，一一年開始恒指全年低位一直在上移，假設今年低位在三月的21,137點已經確認，套用過去幾年，恒指全年高低波幅大約4,600點計，以25,700點作為目標，應該一啲都唔過分。

昨日傍晚歐洲央行議息後，出乎意料減息0.1厘，基準利降至0.05厘的紀錄低位。歐元應聲急挫，再創14個月新低。

中鋼協數據，內地鋼材需求持續疲弱，反映綜合鋼材價格的指數連跌十個月，七月跌至91.88點，按年跌8.56%。有內地消息指，在鋼價創了十年新低下，部分產品跌到每斤1.4至1.5元人民幣，而一些大型鋼企已經開始出現經營困難及資金鏈問題。

八月中國製造業PMI，無論官方及非官方均差過預期，預示製造業經過一浪的定點刺激政策後，開始後勁不繼，中港股市卻出奇強勢，完全唔理實體經濟疲態。講到底，市場係押重注賭中央要保住7.5% GDP，唔使幾耐會由微刺激變大刺激，定向降準升級到全面降準。

業績預期有改善

當然，股市會唔會表錯情，要等歷史話畀大家知，但如果財政政策轉方向，經驗告訴我們，經營環境最惡劣、最急需扶持、業績差到無朋友的產業，例如鋼鐵股，往往比營運得唔錯或中規中矩的，股價有更大爆發力。

馬鋼（00323）同鞍鋼股份（00347）業績乏善可陳，馬鋼產品主要同建築相關，房地產投資放緩對其銷售影響最大，上半年蝕7.3億元（人民幣．下同），即使唔計存貨撥備3.34億元，淨虧損亦有4.76億元。第二季稍好過第一季，但仲要蝕就差過大行估計，固定成本上升及鋼材價跌是業績見紅主因。至於鞍鋼，半年賺5.77億元，跌17.8%，未至於見紅，但以市場預期全年賺13億至14億元計，上半年仲係未夠數。

馬鋼畀分析員指引，係藉住原材料、鐵礦石跌價之助，七月開始賺到錢，加埋會計化妝延長折舊年期，下半年業績就算唔可以逆轉，但至少無上半年咁肉酸。鞍鋼同馬鋼一樣，高管指下半年成本回落，業績會好番啲。

姑勿論點，除非中央出招刺激樓市及加大基建投資，否則鋼鐵業產能過剩問題唔容易解決，但博鋼鐵股關鍵在於一個平字，馬鋼及鞍鋼市帳率分別為0.46倍及0.63倍，距離十年中位數0.97倍及1.23倍有一大段距離，即使打個七折，潛在升幅都有47%及36%。