公路股持續強勢，除咗已經推介過唔少次嘅深圳高速公路（00548）外，另一隻四川成渝高速（00107）亦不能睇小，尋日即市再創2.85元的一年新高，埋單升1.4%，收報2.82元，佢隻A股則升1%至3.02元人仔。公司近日更涉足產業投資基金業務，料可為業績帶來額外動力，配合牛叉擴闊，發出買入訊號，阻力先睇3.1元，支持位兩個半。

成渝高速業務包括投資、建設，管理及經營高速公路及一座高等級收費橋、經營高速公路沿線加油站，以及物業開發，上半年純利增逾一成至5.5億元人仔，原因係高速公路沿線經濟發展推動車流量增長，同埋工程建設及能源銷售業務規模迅速擴大。

期內通行費收入增長一成至12.8億元人仔，收入佔比由33.4%跌至29.8%，其餘業務如高速公路沿線加油站經營，以及廣告及資產租賃服務，分別增長47.6%及51.2%，反映公司推進多元化策略、增強抗風險能力。另績後高盛出報告叫人買，話佢BT（建設─移交）項目收入激增1.5倍好過預期，而且認為可以受惠滬港通，畀佢目標價2.9元。