A股昨日再升，滬綜指突破2,300點關口，港股隔日急升568點後，本預期會有一定調整壓力，但就擺出「唔願跌」的姿態，恒指收市跌20點，報25,297點，大市主板成交由前日過千億，稍為回落至862億元。

恆指期貨走勢

期指即市表現波動，由25,260點一直挾到去全日高位25,340點，最後半小時又急轉直下，落到去25,189點，日市收25,197點，成交5.09萬張。

睇番恒指上升通道，以七月三十日24,912點及八月十九日25,201點的延長線，今日阻力將會在25,469點，與昨收市指數相差唔到200點，到底大市會上破通道頂阻力，由超買變成極度超買，抑或以調整或者橫行，以時間去消化周三的升幅？機會都不能抹殺。

不過，以周三過千億成交爆升，推高指數的資金，仍高度集中個別股份身上。經驗告知，買貨資金還是極為揀擇，即使先有回吐出現，後市再改寫新高的機會仍高，因市況距離基金放心入市，散戶爭先恐後的升市水尾，仲有一大段時間。誤中走勢陷阱爆升前平盤的筆者，按計劃先補回一注好倉，平均成本約25,220點。