Fundman睇市：中海發展只宜小注

常言道五窮六絕，六月港股至今波幅之窄，是近半年罕見，相反港元匯價持續在強方兌換保證相距10至15點子之內徘徊，強勢畢呈。主觀意願，未來一星期，近十隻新股排住隊招股，合共吸資120億元以上，資金泊入港元區可以相信多少與此有關，也令到大市在高位出現升得慢、又唔願跌的牛皮悶局。

折讓股質素欠佳

滬港通最快三個半月後開車，個市繼續玩AH折讓，幾隻折讓較大股份，洛玻（01108）、山東墨龍（00568）以及東北電氣（00042），升幅介乎13至28%，但老實講，睇番呢批大折讓股份，營運質素之差，買佢不如去賭波膽好過。

另外，航運股都算滄海遺珠，自五月中國出口數據回升，兼好過大行估計後，航運股都見唔少貪平的捧場客落疊，走勢較佳的兩隻算係中海發展（01138）以及中外運航運（00368），昨日分別有2.4%及1.3%進帳。

反映乾散貨運費的波羅的海乾散貨指數，上星期五跌到落906點今年新低，同年初大約2,200點比較，跌咗超過一半，環球航運業會唔會因為中國一兩個月的出口表現回穩而復甦？睇嚟衝入去嘅，心口都定必有個勇字。

不過，股票唔會一條直線向下，偶然都梗會借消息反彈，事實上以中海發展為例，一四年預期市帳率只係0.63倍，同五年平均的0.91倍有一段距離，亦都仲低過○八年金融海嘯低位約0.7倍。毫無疑問，要等盈利能力回升至一一年的10億人仔樓上（當年純利較比一○年大跌36%），樂觀睇至少要等到一五年，較合理是一六年，唯一賣點係夠平，小注無妨，睇今轉企穩5元的話，可唔可以見一見5.5至6元。

筆者批中，新世界（00017）供股私有化新世界中國（00917）的計劃埋門一腳撻Q收場，成件事最意想不到，係並非由有買貴貨之嫌的新世界小股東反對推倒交易，反而係被收購的新世界中國股東大會否決。姑勿論點，新世界股已供、錢已袋，亦唔使回水，負債比率將會大降，個人認為私有化不成都無蝕，反而最不利係一直想博到最後，等每股6.8元投降的新世界中國小股東。

大戶沽新中搵食

睇番新中股價由消息前的5.14元炒到上停牌前的6.38元，儘管近排內房股無五月氣氛咁差，大都收復唔少失地，但新中復牌跌番期間七成升幅唔奇，計落可以去到5.5元左右。

成單刁吊詭之處，是新中除消息曝光後首日掂過6.8元投降價之外，大部分時間維持大約4毫子的套息水位，當然，多少同新世界方面多次揚言唔會加價有關。

值得留意期間沽空比例長期高企，單是五月至今，沽空股數比例出現單位數字只有三日，臨近投票的個多星期，比例持續企於三、四成，可見睇死私有化計劃夭折，賭佢今日裂口開低搵銀的大孖沙，絕對唔係少數。