內地股市做好，但未有帶挈港股上升，恒指跌18點收市，報23,300點，全日高低波幅僅107點，主板成交478億元。雖然市況淡靜，但仍有板塊成為跌市奇葩，最突出莫過於AH差價概念，東北電氣（00042）急升28%，山東墨龍（00568）升20%、成都普天電纜（01202）、浙江世寶（01057）同洛陽玻璃（01108）都升逾一成。反正AH差價幾多先至叫正常並冇準則，咁正好方便炒家無限想像借題發揮，撞啱呢排淡市炒作對象選擇唔多，故能聚到人氣，所謂「時勢造英雄」，莫過於此！

上海石化H股現價較A股有逾四成折讓，炒差價股不妨望多兩眼。(資料圖片)

翻查資料，在滬港通名單之內AH股差價較大的有天津創環（01065）、洛陽鉬業（03993）、上海石化（00338）、一拖（00038）及北辰（00588），H股價格較A股存在40%至50%折讓，夠膽坐順風車的缸邊友，可以望多兩眼。

上藥毋須心急食胡

睇番國策板塊，尋日個別醫藥股亦有動靜，國藥控股（01099）升1.6%、康哲藥業（00867）升4.3%、上海醫藥（02607）升2.4%。講起上海醫藥，上月中旬阿莊亦曾建議博佢財息兼收，當時做價14.22元，末期息每股0.26元人仔已於上月22日除淨，以現價15.62元計，即係話如願以償，亦順利達到當時所講的合理價15.7元。

近日，公司落實斥資5億多元人仔收購多個項目，進一步擴展其醫藥分銷業務的網絡布局。此外，不排除下半年會落實收購藥品製造相關項目，併購活動將有助提升其估值，故建議繼續持有該股，毋須心急食胡。論走勢，股價自上月開始反覆回升，料是浪有機會反覆向上試16至17元阻力區，主要支持在14.8元。

繼敦沛（00812）獲內地西南證券洽購之後，景福集團（00280）亦證實大股東獲洽購持股，上周五股價急升逾兩成後中途停牌，尋日復牌後股價再升逾四成，以全日高位1.07元收市，但市帳率亦只係0.6倍。

其實景福舊年經已結束證券業務，本身經營的珠寶業務表現又唔係出眾，睇怕純粹係賣殼居多。四月底，阿莊亦講過，香港主板殼價經已炒到上五、六億銀。由於現成靚殼選擇唔多，兼且叫價甚高，聽聞班專門幫人搵殼的「專家」，已轉移目標去搵一些平平無奇或業務處於夕陽階段的中小企業，協助佢地搞靚盤數上市，並與大股東達共識，兩年後賣隻殼出嚟。由於呢類股一開始就有賣殼準備，管理層唔慌會積極搞業務，上市無耐實際業務係點好快現形，故投資者認購新股時宜打醒十二分精神！