Fundman睇市：房託基金 有力再彈

上一次日本提高消費稅，已經係十七年前嘅事，而日本今年八月份失業率，半年來首度回升，似乎強勢首相安倍的政治蜜月期開始完結，經濟迷失廿載的日本有冇真正復甦，依家先到戲肉。

同樣是十七年一遇，美國國會民主共和兩黨尋日傾唔掂數，聯邦政府大部分機構因為莫財要被迫關門，就連自由神像都要暫停開放，講到底，今次是美國共和黨想阻奧巴馬醫改計劃的一次政治角力，政府部門休假最終難免影響民生，選票大過天的美國，一班政客最後必然握握手傾掂數，問題係要拖幾耐。分析話每拖兩星期，美國第四季GDP便少0.3%，或者，最樂意見到這情況係聯儲局嘅鴿派成員，因為依家大條道理可以唔退市住。

美國政府機構關門大吉的消息，尋日對亞洲股市影響唔大，日、韓、台、星股市都有些微進帳，估計同市場已預咗最壞情況發生，上星期跌定先有關。尋日，中國公布九月份製造業採購經理指數（PMI），按月升0.1至51.1，但比分析員估計的51.6差一截，睇埋細分數據，大、中、小型企業PMI，分別係52.1、49.7、48.8，由大型企業多屬國家，小型企業以民企居多，可見國強民弱的情況未變，數據也顯示中國經濟第三季雖然見底，可是復甦動力並非太強。

近期A股偷步跌，國企亦都陰燭連連，派貨格局明顯，九月的PMI正好畀一班大孖沙估中，季結窗櫃粉飾過後，只怕中資股會有較大的調整，大市先回到22,000至22,500點搵支持的機會唔細。

自貿區熱情急冷卻

上海自貿區正式成立成為近日熱門話題，一直無寫過的原因，是在下所知唔見得多過大家。一句到尾，上海如果得，香港肯定大鑊，但從官方提出十八個負面清單，自貿區亦唔係想像中自由，單是互聯網限制就同區外沒有兩樣，加埋上星期官媒話自貿區唔係政治租界，喺賓架眼中，真係未開波形象已經受損，加埋本身執行上多未釐清細節，有機會步前海後塵。事實上，炒自貿區概念的A股，「十．一」假期前已見腳軟，香港人要怕自貿區挑戰，不如憂慮本地金融中心特色，回歸後正逐漸流失仲好。

亞洲股市尋日在美國政府暫時停開的消息下反彈，今日港股表現，要睇美國影響大啲，抑或中國PMI影響大啲，早前已經講過要小心內地九月經濟數據唔及七、八月強，事實多隻藍籌重磅股都比指數更早跌穿10日線，顯見聯儲局話退又唔退的決定，反而令市場對未來貨幣政策的風險溢價有所提升。

恒指於23,500點的雙頂，短期升穿機會降低，而近期十年美債孳息，亦從高位3厘回到2.64厘水平。今次國債上限爭拗勢必使美國第四季GDP雪上加霜，退市機會下降，不妨留意番yield play，尤其中國經濟動力減慢，可能促使資金由增長股回流到防守性股份身上，特別是早前因預估美債息抽上3至4厘，而畀基金隊殘的置富產託（00778）及領匯（00823）等房託基金，應該仲有得彈吓。