屯門鄉事會路街舖向來都以藥房及餐廳等民生日用品店舖為主，但受屯門西鐵站上蓋V City大型商場及瓏門入伙刺激，條街零售氣氛唔同晒，好多業主都喪加租。聽講有個地舖早前租約期滿，業主分間成兩個招租，其中一個以近10萬元租出，剩番嗰部分依家嗌緊每月約15萬元。若以該意向租金租出，兩個舖新租金夾埋近25萬元，同之前租金比高咗近1.5倍。

屯門鄉事會路有約50間地舖，部分業主租金加幅以倍數計。

街坊觀點
居於屯門區的黃先生指出，連鎖店搶租鄉事會路地舖將是必然趨勢。

從事海味批發的陳小姐認為，租金愈來愈貴，經營環境困難。

屯門鄉事會路地舖近期租賃個案

劉Sir去咗鄉事會路睇過，條街約莫有50間地舖，商戶主要係餐廳、銀行同中西藥房為主，大部分都係做街坊生意，事實上，自從V City今年八月初正式開張，吸引唔少人入嚟，加埋該商場樓上嘅瓏門1期業主開始收樓，消費氣氛比之前熱鬧好多。

呎租達190 交投旺

有區內代理同劉Sir講，過去幾個月，條街已經錄到幾宗地舖租賃成交，唔少呎租去到約莫160至190元，同之前比較，升幅超過1倍。

佢又話，鄉事會路有個原本由財務公司租用嘅地舖，月租金約10萬元，業主早排將個舖分間成兩個出租，每個面積約1,000方呎，其中一個幾個月前已租出，估計月租金近10萬元，接近之前成個舖嘅租金，至於剩番嗰部分，業主更嗌緊每月約15萬元，呎租約150元，若果真係以該意向水平租出，兩個舖新租金加埋近25萬元，同舊租金相比，足足升近1.5倍。

上述大型商場開幕後，商戶都願意以進取租金搶租地舖，有代理話，該街道28至38號地下部分，面積約850方呎，原本由財務公司租用，啱啱以每月約15萬元租出，呎租近180元，比起之前租金大升約1.7倍。喺條街經營海味批發十多年嘅陳小姐同劉Sir講，「商場開幕後，條街人流較以往多，雖然依家租緊嘅舖位唔近V City，但早前亦以每月約7萬元續租，加幅都有四成。」

鄉事會路勢成熱點

鄉事會路勢必成為屯門另一消費熱點，近年好少買舖嘅恒生銀行（00011）都「出手」，八月底斥資1.8億元買咗4至26號地下6及7號舖與閣樓部分，同1樓全層等樓面，計劃在該址提供分行服務。