張家輝和關詠荷結婚多年一直恩愛，近期卻傳出感情生變，不過兩公婆未受影響，日前家輝心情大靚逛街，而關詠荷則繼續忙湊女。關詠荷接受《好報》專訪時親證關係不變，家輝更大講愛的宣言！

張家輝與關詠荷齊齊否認婚變，繼續恩愛。

關詠荷親力親為湊女上堂。

日前張家輝獨自Shopping買帽，可惜空手而回！

關詠荷與張家輝接受《好報》訪問時，力證夫妻情不變。

張家輝和關詠荷近年屢傳婚變，不過二人都口徑一致否認謠言，日前家輝被《好報》拍得以一身潮人打扮單拖到中環濕平，專攻Cap帽的他雖然沒有斬獲，但心情仍然大靚。而關詠荷則湊女兒Brittany到中環上堂，兩夫妻雖然經常分頭行事，但恩愛依舊。

家輝日前接受《好報》訪問時隔空冧老婆：「如果100分滿分，梗係畀佢100啦！冇老婆就冇我！」他又表示太太給予他十足自由度和空間：「所有決定佢都唔會干預我！」對於有指他不滿太太拍劇而無暇照顧女兒及家庭，他否認並稱只希望老婆舒服：「唔係唔畀，唔想佢出嚟只係因為唔想佢咁辛苦！」他又表示如果老婆遇到心儀劇本及好製作，絕對支持她：「只要佢鍾意就去做。」談到有指他因拍電影《激戰》而令抑鬱症復發，更影響夫妻關係，他笑說：「套戲票房咁好，我不知幾開心，邊有抑鬱？我哋對呢啲傳言都係笑吓就算。」

唔會再追BB

雖然家輝表示情緒病沒有復發，但關詠荷對於在外工作壓力甚大的老公，都有一套為老公紓緩壓力的方法，她說：「佢喺出面打仗，點樣辛苦都好，我都會Set好屋企，等佢返到嚟舒舒服服，咁就已經係最好嘅事。」曾經兩度小產的她於41歲高齡誕下愛女Brittany，熱愛小朋友的二人坦言早年曾經努力追B，惜上天未有「派籌」，她說：「早幾年我哋好努力去嘗試，但上天冇籌派到畀我哋，所以都完結咗，畫上咗個句號，所以都應該唔會再追。」