IFC已換上以十二生肖為主題嘅賀年裝飾。
記者尋日行過IFC，發覺呢個香港金融地標已換上以十二生肖為主題嘅賀年裝飾。去得IFC同啲金融界老友敍舊，當然會八卦吓佢哋今年加幾多人工，有冇得過個肥年，同埋有咩新年願望啦！佢哋都話今年有人工加同出花紅，雖然未至於好多，但已好過前幾年。金融界呢排可謂腥風血雨，上月頭渣打先話喺香港裁成一百人，之後大和、野村都先後傳出裁員消息，但啲老友又唔特別擔心。
于正人唔覺得金融界環境轉差。（資料圖片）
喺IFC返工嘅瑞銀亞洲股票衍生產品銷售部董事總經理于正人話，每個行業都會炒人請人，並唔覺得金融界環境轉差。佢又話政府監管嚴格咗，投行依家請緊好多風險管理同法律顧問人才。佢預期羊年會有深港通推出，唔同國家都會減息，令股市暢旺，希望自己做輪之餘，可以發掘多啲新業務。
法巴上市衍生產品部執行董事郭小菱就話窩輪市場競爭激烈，投資者醒咗，生意難做，希望羊年個市好番啲。
第一手消息請下載on.cc東網
