為咗迎戰建仔同工聯會嘅小花，馮檢基搵咗深水埗明哥（圖）幫手派飯盒畀老人家。（資料圖片）
唔少人都批評建制派係靠派「蛇齋餅糉」籠絡地區人心，但做地區工作嘅泛民主派政黨，其實好多都唔輸蝕去跟風，派蛇齋餅糉嘅頻密程度不比建制派少。好似一向以深水埗起家嘅民協咁，雙料議員KK馮檢基為咗迎戰掛住建仔同工聯會牌頭嘅雙學士小花Joephy陳穎欣，搵咗有「深水埗明哥」之稱嘅北河燒臘飯店東主兼廚師陳灼明，每個月贊助最多七次派免費飯盒。
KK話Joephy依家由星期一至五，都會為老人家派飯盒，雖然佢哋係做地區工作起家，唔係好想派蛇齋餅糉，但係對家來勢洶洶，佢都冇得唔跟風。既然對家派星期一至五，佢就聯同深水埗明哥，喺每個星期六同初一、十五派二百盒飯畀老人家。佢又叫街坊飯盒照食，但就照投票畀佢咁話。睇嚟最着數嘅，都係一班長者，如果精嘅，隨時日日都有免費飯食添！
第一手消息請下載on.cc東網
