啟德郵輪碼頭面對無敵大海景，景色優美，但康樂及文化事務署就佔用咗碼頭天台一個擁有三百六十度全海景嘅單位做辦公室，而唔係用嚟放租增加稅收，認真嘥料。本身係「煙民」嘅立法會議員「長毛」梁國雄尋日喺立法會建議當局應該做露天食肆，仲話「淨係做食煙客都有排做啦！」莫非佢想將郵輪碼頭變煙竇？
香港實施室內食肆禁煙，煙民想一邊吸煙，一邊享受美食就要搵露天食肆。長毛尋日就問商務及經濟發展局局長蘇錦樑，會唔會將郵輪碼頭打造成畀港人享受海景、食嘢遊玩嘅好地方。蘇錦樑話其實碼頭已有酒樓、咖啡室等食肆喇，仲反問長毛究竟有冇去過添！
但長毛就反駁話︰「酒樓唔係露天o架嘛，好似我食煙咁，搭車入去食嘢、睇海景，淨係做食煙客都有排做啦！」原來長毛「醉翁之意不在酒」，佢關注嘅唔止係有冇飯開，而係可唔可以一邊食飯，一邊歎支煙至真。不過，碼頭天台其實係公園，萬一如長毛所願任人「打邊爐」，豈不是將公園變成煙竇？
第一手消息請下載on.cc東網
