梁智鴻夫婦（左二及右二）同難得返港嘅捷榮（右）及捷華（左）食晏敍天倫。
聖誕節又到，唔少名人出埠旅遊或探親，但名人聚腳地嘅香港會依然好熱鬧。港大校務委員會主席梁智鴻（金刀梁）及弟弟醫院管理局主席梁智仁兩家人尋日一齊喺度食晏。
梁智仁及太太梁許安璞喺家中炮製聖誕大餐。
王桂壎選擇過一個寧靜平安夜。
金刀梁太太馮令儀好有心思，買咗兩部有WiFi功能嘅相機畀一對子女，等佢哋喺外國忙於工作時，亦可第一時間將生活點滴傳返嚟，唔使佢哋兩老心掛掛喎！
金刀梁出名係工作狂，平安夜一樣無休，踩行油睇症。不過一對子女難得回港，於是抽空約埋親戚食晏團聚吓。梁太話，兒子捷榮喺中東工作，負責酒店建築項目，平日想見佢一面都難；至於喺美國從事網絡保安工作嘅女兒捷華就更忙，每年只可返來幾日。
既然一對子女咁忙碌，梁太揀聖誕禮物嘅時候就落足心思，緊追潮流買咗兩部有WiFi功能嘅相機，兩名子女一人一部，方便佢哋即影即傳相咁話。
至於廚藝一流嘅梁智仁太太梁許安璞，平安夜梗要大顯身手啦。梁許安璞話，夜晚會為家人炮製一味火腿薯仔配牛柳。至於應節嘅大火雞，就留待聖誕夜先至食。都話梁智仁有口福喇，但係有口福嘅又點止佢一個呀，梁太仲表示，佢家中養咗一隻狗，所以佢特登買咗一批靚嘅狗糧，等愛犬喺聖誕節亦可以擦餐勁，梁太對動物認真有愛心。
王桂壎享受寧靜平安夜
除咗梁氏兄弟之外，我哋都見到香港國際仲裁中心主席王桂壎，佢一支公喺香港會食晏。講起平安夜點過，王桂壎話，夜晚同家人食完豐富晚餐後，會去教堂望彌撒，一於過一個寧靜嘅平安夜。
第一手消息請下載on.cc東網
