設計圖片及對白
有「頭箍小姐」之稱嘅財經事務及庫務局常任秘書長區璟智正式退休，結束三十二年為官生涯，佢尋日回顧吓咁多年嘅工作，話工作風格受到三位女上司影響，仲話呢三位係佢最欣賞嘅人，佢哋係乜高人呢？原來係前申訴專員戴婉瑩、行政會議成員葉劉淑儀及公務員事務局前局長俞宗怡！
「頭箍小姐」形容戴婉瑩做嘢好硬淨，尤其係處理知識產權方面嘅工作時處理得很好。至於葉劉就好夠膽提出新穎嘅諗法，當年提出測試玩具安全嘅新做法時，仲反問大家點解唔得，非常有膽識，呢種作風同相對保守嘅公務員好唔同。俞宗怡又點呢？「頭箍小姐」話，記得有次交一份預備咗幾個星期嘅報告畀俞宗怡，點知佢只係用咗唔夠三十分鐘就搵到十幾個錯處，仲將文件彈番轉頭，所以話俞宗怡係一個行事謹慎但好有效率嘅人，令佢非常欣賞。
「頭箍小姐」大送聖誕美言當禮物，仲分享咗佢三次進出財經科嘅往事，佢直言，三十二年內冇一日唔係忙住咁過。尋日最後一日返工嘅佢，辦公室物品已經執拾得七七八八，佢話最懷念嘅可能係每朝開會前必經嘅一條走廊，有成一百米咁長，沿途牆上貼有佢哋同事及活動嘅圖片，今後就只能留喺記憶中喇！
第一手消息請下載on.cc東網
