設計圖片及對白
兩個幾月嘅佔領行動，搞到警民關係極度緊張，獨立監察警方處理投訴委員會（監警會）成為各方關注跟進糾紛嘅機構，尋日，港府公布新一批監警會成員名單，副主席同部分委員都換咗人，三個副主席中，除咗原有嘅立法會議員陳健波獲再委任外，另外兩個就係新丁，由同屬建制派立法會議員建築、測量及都市規劃界謝偉銓同金融服務界張華峰接咗棒，監警會嚟緊嘅工作既係全城焦點，夠晒火藥味，新丁副主席唔易做o架。
社會繃緊易變夾心人
監警會早前已披露，依家已經收到涉及警員喺佔領行動中嘅投訴過千宗，唔少仲要深入調查添，依家社會氣氛愈嚟愈繃緊，監警會嚟緊唔單止工作量大，仲動輒成為夾心人添，最弊嘅係，副主席身兼立法會議員，有乜依郁，佢哋都好易成為個會嘅代言人，所以有人話，依家接監警會嘅重任係一個挑戰。
講到謝偉銓同張華峰接替即將卸任嘅工業界林大輝同石禮謙，尋日仲有單趣聞，事關政府新聞處出稿前四個鐘，謝偉銓已經發稿公布，惹來佢「搶閘」公布呢個好消息嘅猜測，最後證實原來係一場誤會。謝偉銓話，尋日朝早出版嘅憲報已經刊登咗有關消息，佢於是出稿公告天下，點知新聞處要等到下晝先至公布，佢強調，自己絕無「搶閘」之意。至於監警會其他成員嘅變動，則有港大法律學者張達明同方敏生卸任，換上陳章明、鄭錦鐘、何錦榮、許宗盛、關治平同任景信六人，成員總數亦由二十四人增加至二十八人。
另外，政府亦公布一連串委員會成員名單，張建良接替石丹理出任禁毒常務委員會主席，前水務署署長馬利德出任環境諮詢委員會成員，前立法會勞工界議員葉偉明接替潘佩璆出任人力發展委員會成員一職。
第一手消息請下載on.cc東網
