庫克走出蘋果教主喬布斯嘅陰影，仲成為今年最佳CEO。（資料圖片）
二○一四年好快完結，美國CNN尋日公布咗今年十大優秀CEO，結果由蘋果公司(Apple Inc.)嘅庫克勝出，作為教主喬布斯嘅接班人，庫克啱啱上任時，成日畀人質疑佢唔夠創意，近年，佢終於擺脫咗教主嘅陰影，唔單止推出大屏幕版嘅iPhone6+，賣到斷晒市，嚟緊又有新搞作，就係智能手錶Apple Watch，庫克今年帶領住蘋果公司市值屢創歷史新高，當選第一都可以話係實至名歸。
雅虎CEO邁耶，喺榜中位列第五。（資料圖片）
呢個榜上，仲有另一個矚目人物，佢就係雅虎嘅CEO邁耶，位列第五，邁耶二○一二年接任CEO時做到啲成績，證明靚女都做得嘢。
但今年就畀班股東由年頭鬧到年尾，皆因佢豪擲金錢，不停收購啲冇咩作為嘅初創企業。前日雅虎舉行業績公布會，邁耶成個喬布斯上身咁，不單着到靚一靚，仲學晒教主企喺個high-tech大屏幕前講解，同啲股東近距離咁交流多啲，希望令班股東對佢改觀喇。
九月份阿里巴巴喺美國上市時，邁耶淨係沽咗百分之五嘅股份出嚟，當時班股東個個鬧佢做咩攬住百分之十五唔放，依家阿里股份升穿一百蚊，證明邁耶放長線釣大魚係正確嘅。
第一手消息請下載on.cc東網
