萬惡嘅SHF，唔只出拉打及《龍珠》嚟到吸乾男生嘅銀包，兩年前嘅夏天仲加開《美少女戰士》系列，連女生嘅零用錢都唔放過，Bandai班高層，你哋知唔知做女仔有好多錢要使(口架)？買衫買鞋買手袋買化妝品，仲要做Facial加埋報名上Yoga，開支幾大！依家仲要個個月供Bandai會咁款買美少女Figure，嗱嗱嗱，今個月仲出埋Super Sailor Moon，點算先？睇嚟解決方法只有一個，就係身為男友或老公者，呢個月買少隻拉打或者高達，幫手找咗呢條數。

面相塗裝都算交足貨，似足動畫人設，不過只得四款表情，少過兩年前嘅Sailor Moon。

專用地台表面印有「Super Sailor Moon」嘅字樣，支柱可作多段調校。

髮尾與蝴蝶結都做成半透明形態，增加飄逸效果。

除咗基本嘅左、右手開掌形態，隨盒另有11款造型手掌，最抵讚係跟埋收納架，方便收藏。

Figure全高約145mm，背後嘅大型蝴蝶結夠晒搶眼。

SHF標榜可動性高，Super Sailor Moon都唔例外，加上多款造型手掌，擺靚靚甫士冇難度。

文︰Dick　攝︰Homan

透明組件　畫龍點睛

相信唔少爸打都遇過女友或老婆大人呢個問題︰「隻隻拉打/高達都差唔多樣，仲買？」跟住你就會振振有詞、如數家珍咁款同佢解釋拉打1號同拉打2號其實係兩個人、高達RX-78有1號2號及G3之分……美少女戰士嘅世界何嘗唔係一樣？孫悟空識得變做超級撒亞人，去到動畫版嘅Season 3 & 4（Sailor Moon S & SuperS），Sailor Moon亦進化變身成Super Sailor Moon，有咩唔同？髮髻下面多咗兔仔耳嘅髮簪、衫袖變長變透明、短裙顏色由藍變白，仲有背後嘅蝴蝶結唔只變大咗，仲由粉紅色變成白色，以上種種都喺最新嘅SHF版本還原晒出嚟。除此之外，長馬尾與蝴蝶結嘅尾端做成半透明形態，加埋短裙與手套嘅白色部分用咗珍珠白塗裝，令造型更飄逸、更華麗，話晒係Super Mode喎，梗係要與眾不同啦！

進化關鍵　神器在手

作為日系少女動漫代表作，水汪汪嘅大眼睛呢項人設特色，《美少女戰士》又點會少？今次嘅SHF Figure亦都忠實還原，不過面相表情只有四款，兩年前嘅同系Sailor Moon就有六款喎；好在造型手掌補番數，合共13款之多，而且全部同手套一樣髹做珍珠白，唔會變成鴛鴦色。其他Parts方面，既有專用地台，亦有雕工精美嘅螺旋愛心月權杖，至於神器聖杯更加唔少得，冇咗佢，點變做Super Mode？窩心提示︰各位爸打咪以為買咗呢款SHF Super Sailor Moon就可以找清條數，Mercury、Mars、Jupiter及Venus唔識變做其他版本咩？何況喺Super Sailor Moon之外，仲有Eternal Sailor Moon仲未出Figure，問你驚未？

Naoko Takeuchi/PNP, Toei Animation

查詢：2433 1828（瑞華行）

文︰Dick　攝︰Homan