又是同一句，文章的內容涉及電影劇情，注意。

昨天講到新戲《屈機起格命》，確實是一齣完全胡鬧、搞笑、大美國主義、不需太用腦的電影。不過，總算無乜悶場，看得幾過癮。

胡鬧還胡鬧，其實當中還是有些潛台詞。首先，為甚麼外星文明要化成電子遊戲呢？電影中解釋，因為80年代的街機比賽被製成光碟，NASA把它射了上太空，結果外星人真係收到，以為地球人要挑機，於是製造成同樣形態去同人類打過！

現實世界中，NASA真係曾經於70年代射過光碟上太空，但不是遊戲比賽，而係人類男女身體、地球位置及以幾十種語言打招呼，包括廣東話。這光碟也剛剛在上年飛出了太陽系！這也是曾有科學家擔心之地方，萬一外星文明錯誤地解讀相關資料，以為是人類宣戰的話，我們又會否死得不明不白呢？

電影中選擇了外星人化身成美國總統列根，坐定定對住鏡頭宣布外星人將入侵一幕，UFO愛好者必定知道這個潛台詞，話說列根80年代在聯合國大會演講時，忽然在解釋美國要發展星球大戰計劃，是因為大家又怎知道外星人不是住在地球人當中呢？嘩！當時真係令到好多人有無限聯想(口架)！包括我！真懷念80年代！

而在電影當中，那位美國總統的角色，明顯係諷刺緊小布殊，又蠢又唔識字，那一幕向小朋友講故事的場景，不就是911事件發生的時候，小布殊正在做的事嗎？