北水動向：石藥憧憬業績報佳音

內地股市昨日輕微回調0.16%，但港股就似乎預示有好消息到臨，恒指上升逾四百點，若然抽穿月初高位19,771點，呢一浪目標睇50日線20,381點；但若受阻回落，則好可能要再試底，看官宜做定兩手準備，反正小注跟炒無妨，但依家未到瞓身抄底的時候。

內地一月份新能源車產量1.61萬輛，同比增1.4倍，但按月大降84%。除了因為補貼下降前，於去年十一及十二月銷量急增透支了需求外，「騙補」調查以及新能源車應用推薦車型目錄更改，亦為影響因素之一，但相信今年稍後時間產銷量大幅上升的預期未變，早前提及的比亞迪（01211）已重上37元樓上，呢轉有勢試叩40元大關。

新能源股氣氛持續見到改善，發盈喜的華能新能源（00958）話咁快見2字頭，昨日曾高見2.03元，引發獲利回吐，收報1.89元，升7%。好耐唔見有動靜的光伏股亦有異動，其中興業太陽能（00750）股價急升13%，風電股金風科技（02208）再升12%。

高偉電子可食胡

此外，手機及電池股亦有瞄頭，比亞迪電子（00285）急升近一成半，而iPhone概念股高偉電子（01415）亦急升13%，收報2.71元。高偉有唔少基金坐貨，可惜股價表現令人失望，照計樓上有唔少蟹貨，短炒有利潤要見好識收！

好耐冇睇過藥股，今日就留意吓隻石藥集團（01093），昨日股價收6.46元，升4.7%，成交1.76億元。圖表顯示，6元水平乃過去兩年的主要支持位，近期跌浪跌至該水平亦現承接。

再看公司去年首三季純利增長35%，去年度業績有望報佳音，本月初公司藥監局准可展開二十八項產品的臨床試驗，現價一六年度預測市盈率20倍樓下，派息有望增加，估值吸引，中長線攻守兼備。