作為下半年全球最佳表現股市,A股確是狂態畢呈,尋日臨收市一個鐘,又再由跌變升,滬綜指升39點,收3,061點,董伯話祖國好,香港好,但事實並非如此,至少股市情況就唔係咁發展。近排港股認真嚇死人,單是第四季,勢估唔到先有滬港通,再嚟阿爺減息,個市依然要跌到四腳朝天。計埋尋日個市已經連插五日,昨跌多84點,收22,585點,即市低位22,529點,穿埋十月初股民以為阿爺「懲罰」香港,唔放滬港通時造出的22,565點低位。

環球超低息期或成常態,滙控作為收息股有可取之處。(資料圖片)

太陽日誌

滙控業績預測(美元)

今次跌市最肉酸係愈插成交愈大,周一主板686億元易手,周二升至912億元,尋日去到1,077億元,睇落恒指似乎跌唔多,國指更係升住收,可是近1,100隻股票下跌,加埋成交唔細,可見近期狂沽增長型股份,換入低估值重磅國企,尤其中資金融股的大趨勢,漸漸進入白熱化階段。

內銀備受追捧

尋日三隻重磅內銀,中(03988)建(00939)工(01398)合共貢獻恒指72點,啱啱就畀兩隻瀉極唔止的藍籌濠賭股抵銷。依家純睇指數,實在無乜意義,留意番整體大市股份升跌比例,更能反映到魚缸實況。

好耐無人再提「聖誕鐘炒滙豐」,因為金融海嘯之後,此曲早已不彈久矣。今年突然諗起,皆因見到明明面對利率市場化、資產質素踏入轉差周期、基本因素展望麻麻地的內銀股,純粹因為內地投資者對中央經濟改革的決心予以肯定,以及貨幣政策轉向,都足以炒到飛起。目比之下,滙控(00005)衰極都至多係炒房無表現,環球營收在去槓桿趨勢持續下,無乜增長,但有冇可能,純因為夠平,可以來個人棄我取?

聯儲局會唔會將議息聲明裏面「維持一段長時間低息」的字眼刪掉,執筆時未知結果,但睇見近排十年美債息級級落,由月初公布就業數據時近2.4厘,碌落2.1厘水平,睇埋德、法、意、日同樣有咁情況,已經可以體會到,環球超低息可能已成常態,低通脹下美國將來加息幅度也將有限。

由這個角度,純把滙控當收息股,其實唔失禮,預估一五年股息率有5.8厘,回報已比滙控現行永贖債券5.3厘高出不少,尤其睇番依家市帳率0.95倍左右,比○八年至今平均的1.2倍低近21%,趁俄羅斯危機,基金恐慌性拋售跨國金融類股份避險,在下反而認為滙控已漸漸跌到一個有吸引力的水平。

吉汽盈警拖累

估唔到第一隻因為盧布插水出盈警的股份,是筆者心水之一的吉利汽車(00175),因為出口市場急劇萎縮,俄羅斯業務可能錄得外匯匯兌虧損,公司估全年業績要跌五成,以一三年賺26.6億人民幣計,即係得番13.3億人民幣。近排唔少大行推介吉汽,但奇怪係愈煲愈低,由十一月初3.68元浸浸落,尋日消息一出,更大跌一成七,收2.59元。

其實撇除一次性的盧布貶值,業績跌兩成一左右,同中期時差唔多,雖然無因下半年內地自主品牌汽車市佔率回升而收復失地(事實有預測認為集中下半年推新款,推廣及銷售成本相對高,反而不利短期邊際利潤),證明淡市之中,任何風吹草動的殺傷力都會被倍數放大。

另外,讀者如想知道心水股票最新價位,可以喺android的play store或者iOS的app store下載東網money18手機應用程式,隨時睇到心水股票免費報價服務,或登上東網money18,獲取更多最新最快資訊。至於27958888電話聽上日股價服務,將於12月31日後結束。