舖市受佔中事件拖累，市場普遍睇淡明年舖市表現。有代理同劉Sir講，市區一線舖租售價已經見頂，估計下年舖租最多跌10%，售價亦會出現輕微回落。但係新界區未來會係主要新盤供應地區，故區內民生舖位反而會逆市做好，料下年該區舖租可以勁升20%，售價亦睇升10%。

新界區民生舖獲看好，料明年租金升幅達百分之二十。（資料圖片）

潘志明（右二）稱，今年工商舖錄得多宗逾億元成交。

代理對明年舖市預測

中原工商舖董事總經理潘志明話，今年舖市變化好大，不過，隨住佔中嘅結束，預計本港舖市會喺農曆年前追落後，但整體嚟講，舖市經已回落，相信一線區舖位售價會輕微回落，而租金就會跌約莫5至10%。

不過，新界區舖市又唔同咁講，好似元朗同屯門區將會喺住宅新盤主要供應區域，具一定投資價值，相信區內舖租會勁升20%，售價亦都會升10%。

該行商舖部董事黃偉基話，今年舖市無論成交宗數同金額都錄得五年來新低，今年僅錄得1,606宗，按年跌咗近38%，不過好彩逾2,000萬元嘅大手成交都有唔少，錄得約421宗，涉資約423億元，佔咗整成交金額86%。

資金入市 大刁唔憂做

另外劉Sir睇返中原資料，今年工商舖市場錄得好多宗逾億元大額成交，資深投資者、外資基金及內地資金齊齊入市，令全幢物業或全層零售樓面成交湧現，潘氏話，相信呢個情況將延續至明年。

該行寫字樓部顧問陳雁樓話，明年整體商廈售價升幅可達約10至20%，租金可錄10至15%升幅；而工商部董事郭楚華話，工廈售價及租金明年會上升10至15%及5至10%。

美聯旺舖董事盧展豪就認為，新界區舖位未必升得咁勁，因為而家啲內地旅客都唔一定湧晒去新界區買野，所以預計區內舖價同租金走勢都會比較平穩，而一線區舖市方面，舖價走勢平穩，租金亦會大跌10%。

核心區上月買賣縮29%

事實上，據該行研究部資料，上月份核心四區包括旺角、尖沙咀、銅鑼灣及中環，只係共錄到15宗舖位買賣成交，按月少29%。

另一方面，新界舖位受追捧，消息稱，大埔富善街嘉豪大廈地下雙號舖，以約1,600萬元沽出。另銅鑼灣怡和街雙號地舖連閣樓亦以約23萬租予化妝品店。