Fundman睇市：北京建設值得捧場

昨日公布之經濟數據超出市場預期，六月新增貸款超過1萬億人民幣，M2增14.7%，同舊年錢荒差天共地，中央是否鬆手主宰一切。今日焦點當然放在上半年GDP，7.2%至7.4%其實差別不大，稍遜預期可能令中央繼續維持貨幣偏鬆及微刺激措施，但上周三公布CPI及PPI後無端大跌逾300點記憶猶新，依然不可大意。

中央選取數家央企做改革試點，包括國家開發投資公司、中糧集團、中建材集團、中國醫藥集團、中節能集團、新興際華集團，其實前三者入選早一星期前已在內地媒體曝光，但到昨日先見旗下香港上市公司中國食品（00506）、中糧控股（00606）及中國建材（03323）炒起，而中糧系兩隻A股亦做好，究竟是否顯示市場欠缺效率呢？總之，股民如果醒目的話，就已做咗春江鴨。

央企重組掀炒風

所謂四項改革，最重要一項係國有資本投資公司試點，「國投」早就係呢類型公司，何以仍然叫試點？而中糧亦搖身一變成為投資公司，集團在中港已擁有7間上市企業，如果能像「國投」一樣對併購入股有咁大自由度，隨時成為一個上市王國。

次一級係混合所有制試點，股民相信最為熟悉，中建材集團及國藥集團列入其中，前者一向自命為混合所有制先軀，旗下企業混合所有制數量逾85%，列為試點亦是畫蛇添足。旗下中建材H股股數佔總發行數高達56%，亦係散戶愛股，但正因為街貨多，所以一直跑輸給其他水泥股。不過，集團最為人所詬病的是負債過高，如能引入民資改善債務問題，估值冇理由同另一龍頭股海螺（00914）差咁遠。

回落再買更值博

不過，點樣重組法暫時無法知道，作為試點可減少審批程序，但央企重組仍相當繁複，並非兩三個月可以搞掂，要高追有很大風險，但市場近期喜歡炒消息借題發揮，中食、中糧及中建材等公司股價本已低殘，且基本因素其實不弱，待其回落時才買具值博率。

新股先達物流（06123）上市首日曾經破底，但其後愈升愈有，現已較招股價高逾四成。「物流」兩個字近年值錢，但先達總部在香港，業務主要為貨運代理。

物流股中最強勢非中外運（00598）莫屬，且母公司不斷注資，東英證券日前推介物流股首選為北京建設（00925），該公司今年靜極思動，上星期公布引入日本三井為附屬中國物流集團之股東，日後計劃再引入其他策略投資者，早前收購正峰（02389）擬變相分拆商業地產業務，未來大計包括繼續物色地點興建物流倉及冷凍倉，明年將拓展第三方物流的高附加值業務，天津及北京的物流中心將陸續見收成，所以已轉趨活躍，希望在市場融資以滿足收購開支，下月會進行路演。

集團以其北控集團旗下身份，在物色項目及獲取貸款上均佔有優勢，目標是成為內地三大物流地產商之一；物流股在電子商貿蓬勃發展下，相信將繼續受市場重視，北建可列中線之選。