隔晚美股再創歷史新高，中國六月新增貸款高於預期，加上金管局又再入市干預港匯強勢，市場充斥利好港股訊號。昨日恒指高開136點後，全日在窄幅區間上落，收市報23,459點，升113點，惟主板成交得520億元，大市高低波幅不足100點，期指日市收23,436點，升70點，成交奀到極，得2.7萬張。

恆指期貨走勢

今浪恒指由21,680點升至23,626點見頂，之後調整最低見23,126點，稍低於0.764支持23,166點，跟着又再發力，重越10日線23,416點，大市延續大漲小回的格局，稍為對好友有利。

半杯水，可看成半滿或半空，有人認為港匯長處7.75水平，美股續創新高，港股仲係不為所動，只怕外圍逆轉拖港股後腿。不過，掉轉頭睇，港股僅僅夠500億元成交，可以企穩今年高位的三兩百點範圍之內，如果充斥在港匯的熱錢開始湧入股市，升穿23,500至24,111點的阻力，難度應唔大。

姑勿論點，筆者已按建議，實行以較低張數，坐期指好倉而放棄即市短炒，因槓桿比例極低關係，故短期幾百點上落會當佢無到，一於放長線釣大魚，又睇睇滬港通開車前，會唔會有意外驚喜？