魚缸Blogger：中興通訊挑戰高位

尋日中興通訊（00763）上調上半年盈利預測，由8億至10億元人仔，升至10億至11.5億元人仔，按年增幅2.2倍至2.7倍，股價隨即起舞，急升8.3%，收報16.3元。

中興今次之所以修正上半年盈測，係因為期內合同管理持續加強、內地4G系統項目收入佔比上升，同埋費用增長低過預期，令毛利率有較大提升。修正後大摩同瑞信都叫人買，大致都係話佢可以受惠中移（00941）的第一期招標，同埋下半年的第二期招標，而FDD試驗獲批亦將加快聯通（00762）及中電信（00728）的基站部署，進一步刺激4G網絡建設需求。

查實中興非常落力搶佔市場份額，上月就斥資成億銀彈同興和創投搞TMT行業投資，近日又同中國銀聯推支付功能的高端智能手機。如果睇圖，股價昨以大陽燭兼大成交收復多條平均線，牛叉初現，但係仲未完全脫離去年十月延伸至今的下降軌，若短線企得穩16蚊關，跟炒上望一年高位18.34元。