繼宣布十月開通「滬港通」後，尋日市場盛傳，「深港通」亦好事近。若然如此，港股真係唔愁冇「水」，最直接受惠的當然係港交所（00388）。阿莊打算短期內調整持倉組合，沽出石藥集團（01093），換入港交所，並增持比亞迪（01211）。

未來來自整合龐大業務的相關消息，將成為中信泰富股價的上升動力。（資料圖片）

講番尋日港股，上日升勢延續，話咁快又重上23,400點水平，市底不弱。三大中資電訊合組鐵塔公司，中移（00941）被視為最能受惠相關安排，尋日股價成功突破80元關，收報81.2元，升3%，重上牛熊分界線，亦係今年以來首次回升至80元樓上收市，短線回吐企穩80元樓上，別太快估浪頂。

TCL通訊值得期待

再睇睇電訊設備股，中興通訊（00763）一二年度業績由盈轉虧，一三年度恢復盈利，今年將大打翻身戰，並有望增加派息兼恢復送紅股。前日中興便向上修訂上半年盈利預喜，意味中績比預期更好，投資者信心增強，難怪股價飆到上16.46元，短線回吐在16元邊買貨仲未算遲。

講到呢類股，阿莊心水仲有TCL通訊（02618），股價企穩9元樓上，業績消息將成股價向上闖關的催化劑，未來圍繞移動支付及社交平台等各方面的發展值得期待，可繼續捧場。

回歸十七年，中資企業佔港股比重與日俱增。藍籌股之中，今年又多咗隻中企巨無霸，就係變相被母公司中信集團借殼上市的中信泰富（00267）。前日，中信泰富宣布，向中國煙草總公司及正大光明配股，每股作價13.48元。完成後，前前後後配發給全部27名承配人、約佔收購完成後中信泰富15.87%股權，總集資額逾五百億元的配售活動已完成。

從呢個咁大規模的注資及配股活動可見，呢宗涉及兩地監管部門的交易得到快速審批，顯然係有阿爺祝福；而參與認購的企業，唔少都係內地巨企，至於海外企業，則多半具中國友好背景的，可見今時今日，中企大型融資活動可以自己完全包辦，唔使再依賴歐美企業「點金」﹗

雖然公司名字現時仍未改，但其實可以用母公司中信來看待，資產及市值大幅膨脹，學美銀美林話齋，唔少指數基金會落場買貨。展望下一波，其股價上升動力應來自整合龐大業務相關的消息。阿莊認為，投資者如想透過長線投資，分享中資巨企長足發展的成果，眼前的中信泰富係可取之選。