市區重建局邀請10家財團入標嘅觀塘市中心重建項目，昨日截標收到4份標書，反應叫做普普通通，始終項目總投資額有成180億元咁多，而今次入標嘅大型發展商都係獨資入標，包括區內有大型商業發展嘅新地（00016），以及恒地（00012）同埋會德豐地產，不過長實（00001）今次就未有入標。

觀塘市中心重建計劃第二及第三發展區（紅箭嘴示）收到4份標書，項目提供約1700個住宅單位。

會地代表

恒地代表

市建局觀塘市中心重建項目截標結果

市建局公布，上述觀塘市中心重建計劃第二及第三發展區初步點算收到4份標書，招標遴選小組會評審各份標書，並會盡快向市建局董事會提交有關建議，由董事會決定。

總投資額達180億

而入標財團主要以獨資形式競投，包括新地、恒地及會德豐地產，會德豐地產何偉錦尋日入標時話，呢個屬於市區項目，鄰近港鐵站，集團獨資入標。

不過，長實同埋新世界（00017）呢兩間大型發展商今次就無入標。

劉Sir知道，今次總共有10家本地財團獲邀入標，最後收到4份標書反應都算係咁，老友高緯環球張翹楚覺得，呢個項目係少有嘅市區大型重建發展，但始終投資額比較大，有4份標書可接受，估計項目每方呎樓面地價約6,000元。

美聯測量師行林子彬都認同，項目有唔錯發展潛力，但規模同投資額巨大，所以入標唔算十分踴躍。

呢個項目係市建局歷來最大型嘅市區更新項目，將會提供約149.6萬方呎住宅樓面，提供1,700伙，地面會有4層高嘅大型平台，作交通交匯處及商舖等用途，項目總投資額約莫180億元，市建局會撥款約18億元，補貼呢個大型平台嘅建造費。

補價收入季增43%

此外，劉Sir知道地政總署噚日公布咗最新補地價數字，今年第二季嘅補地價收入約莫24.5877億元，比起第一季多咗約43%，仲創咗近六個季度新高。其中最新登記嘅補地價個案係元朗錦田錦上路住宅項目，補價金額約莫6,359萬元。

上季最大宗補地價個案係四月註冊完成補價嘅觀塘創業街15至17號工轉商項目，涉額逾11.2億元。同區觀塘道326號簽立特別豁免書，可作酒店用途。