Fundman睇市：四環距離見底不遠

希臘肯唔肯因為要歐盟打救，而接納未來要「勒緊褲頭」的附加條件，執筆時未知結果，但看官們應該可由今早港股開大定開細，估到大致結果。

呢期港股日日陰陰乾，尋日反彈，講真真係有啲「唔慣」。恒指以接近高位收市，升251點，報21,850點，主要受歐洲開市後，歐元做好及歐股反彈刺激所致，莫非大戶無懼希臘扭計？諗落由五月底開始，恒指從23,707點起步，累跌超過2,000點，而由伯南克口風，QE2後無下文機會好大，至多維持0至0.25厘低息，同埋用到期債套現買新債，未必會擴大量化寬鬆規模。至於歐債危機，為免「歐豬」國火燒連環船，從歐盟高層言論，希臘獲救只屬遲早（幾年後被迫削債，踢出歐盟重推本國貨幣後大幅貶值屬後話），既然所有壞消息都浮面，大孖沙怎會不趁今個星期來個逆向操作、殺淡友一個措手不及？

建行買貨毋須心急

大市反彈，但部分藍籌表現相當失色，建行（00939）急跌0.15元，報6.44元，創今年新低。筆者早兩星期建議看官等八月底九月初買平貨，估唔到咁快連二月低位6.52元都守唔住！儘管八倍預期市盈率同4.2厘息已經好吸引，但今次跌勢係因為芬佬沽定等接美銀平貨，同基本因素無關，想買的仲係可以等等。

前幾日，筆者先開始由藥業股中尋寶，推介聯邦制藥（03933），估唔到短短幾日反彈近1元，原因除咗估值低之外，基金揸重貨，點都要趁六月結前，為成績表粉飾一番。

藥業股中，最跌眼鏡要數四環醫藥（00460），呢隻一○年新股王，五月被大摩納入MSCI中國指數成分股，當日指數基金在5元樓上狂掃，超過1億股易手，誰不知個半月後，股價跌掉兩成七，得番3.63元。

四環係內地少數擁有自己研發醫藥技術的藥企，在心腦血管藥物的市場佔有率超過一成五，屬內地藥股中的龍頭。由於主攻專科藥關係，產品毛利率也較同業為高，持續在七成以上，發改委今年要藥品降價，市場對高毛利藥品股特別敏感，這從四環股價跌勢可見一二。

由第一季營運數據所見，似乎藥品價格監控的影響沒有市場想像般嚴重，銷售維持雙位數增長外，毛利率也維持在71%，主要是因為四環旗下僅得「前列地爾注射劑」及「川青」兩個產品，被列入發改委下調零售價的名單。公司手頭現金有46億元人民幣，有條件透過收購再擴大產品基礎。

產品價格具競爭力

社會富裕加上人口老化，心腦血管疾病成為內地主要致命病症之一，由於產品價格較進口藥有競爭力，故過去三年，四環盈利增長介乎36至60%。分析員預測，今、明兩年盈利分別為8.51億及11.41億元人民幣，增長63%及34%，取中位數48.5%，一一年預期市盈率18.7倍，PEG為0.39倍。

筆者相信，高速增長的業績，無可能長期被市場忽略，關鍵反而是，從去年大牛市的偏高估值回到合理水平，要跌幾多？昨日低位3.52元，即使未必是短期浪底，相信也相距不遠矣。