葉劉淑儀
政府喺發展新市鎮計劃遇到唔少阻力，但呢啲問題三十年前已經出現。話說立法會議員葉劉淑儀喺沙田車公廟被麒麟撞飛後，令佢「翻箱倒櫳」諗番自己同沙田有乜淵源。葉劉尋日喺社交網站自爆，話八十年代出任新界民政署官員時，咁啱當時沙田理民官就係「孫公」孫明揚，葉劉就曾跟孫公「搵食」。
孫明揚（右）八十年代負責開發沙田，葉劉就話曾經跟佢「搵食」。中為時任總督麥理浩。（黑白資料圖片）
葉劉話當年每個月都要落區同理民官開會，通常會後都夾錢食餐好，所以新界各區有乜別具風味食肆，佢都一清二楚。有次葉劉就打電話問孫公幾時帶佢去大圍食最出名嘅山水豆腐花。點知孫公就話：「要食就快點來，因為大圍差唔多拆晒！」原來當年沙田因為發展新市鎮，好多餐廳都被迫遷。葉劉最終食唔食到碗山水豆腐花，咁就不得而知嘞。
講到政府收地迫遷，葉劉又爆多件「有味嘅事」，話當年政府喺沙田收地時，村民經常因為風水、祠堂、金塔等遷拆問題而不滿，不時出動糞便「招呼」官員，情況同啲電影情節非常相似喎，所以負責開發新市鎮嘅官員真係勞苦功高。
第一手消息請下載on.cc東網
