由反佔中搞默站行動開始廣為人熟悉嘅律師江玉歡,原來身世都好坎坷。話說江玉歡讀中學時經歷三次痛苦,先係父母突然離婚,媽媽又因肝病離世,最後佢先喺親戚口中得知,自己同家姐原來都係孤兒。當佢想報答父母養育之恩嘅時候,媽媽已不在人間。

江玉歡自揭孤兒坎坷身世,期望年輕人可以愛錫父母。

江玉歡早年出咗本自傳,希望透過分享自身經歷,期望年輕人可以愛錫父母,唔好失去咗先珍惜。佢話當年知道自己係孤兒後,逼住要學識照顧自己,平日忙於學業,放假就做兼職,幾經辛苦完成中學課程,最終更成功考入港大法律系。

當佢出來工作,養父突然搵番佢團聚,但好景不常,當佢想花多啲時間陪爸爸時,爸爸因為經歷三次癌病煎熬而離開人間,令佢明白「子欲養而親不在」呢種痛苦。雖然有慘痛經歷,但江玉歡選擇樂觀面對,舊年更加入新民黨嘗試從政,仲積極考慮參選年底區議會,相信呢種堅毅不屈性格,應該有助佢從政之途。

第一手消息請下載on.cc東網iPhone/iPad/Android/Windows Phone Apps