設計圖片及對白
按照現行規定，所有立法會議員月薪都近九萬元，而主席一職就可獲「雙工」，即係每月約十八萬元，至於內會主席因不時要頂上做「代理主席」，所以薪酬方面係「工半」，即係大約十三萬元月薪，但財委會主席人工就冇多到嘞。其實呢個做法保持咗好多年，因為財委會主席以往工作量唔多，逢周五開會好快就可以鬆人，只不過幾年前「拉布」戰興起，財委會主席先變成重要角色。
現時擔任財委會主席嘅張宇人就話呢個做法應該改變，因為財會主席不時要加班，尤其係近年行政立法關係緊張，有時主持會議坐到「屁股都扁」，工作量同以前相差幾倍，相對內會主席好多時「行行企企」就得，無理由內會主席可以呃多啲人工，但財委會主席只係攞普通議員價，所以財委會主席好應該加番多啲人工，否則好唔公平喎！其實今次張宇人呢個要求唔算過分，睇嚟佢平時受受埋埋好多冤屈氣喎，但點解吳亮星在位時又冇提出呢？
大家要留意，雖然張宇人話內會主席「行行企企」只係針對個職位，但咁啱坐緊呢個位嘅就係對家經民聯議員梁君彥，好難唔令人聯想佢係咪喺度寸緊人呢？
第一手消息請下載on.cc東網
