徐英偉被指已向政府提出辭職，但佢（左）同曾德成（右）都冇評論消息。
東方報業集團接獲消息，指民政事務局政治助理徐英偉已向政府提出辭職，料喺今年五月重返所屬嘅建仔任總幹事，徐英偉尋日出席公開活動時對消息不置可否，強調依家仍以政治助理嘅身份繼續工作，未來如有新人事動向，會喺適當時候交代。
徐英偉嘅上司、民政事務局局長曾德成亦冇評論徐英偉辭職消息，但佢形容徐英偉「非常幫得手」，相信佢對香港政治現況同埋未來發展都充滿信心。
現屆政府先後有三名政助辭職，如連同徐英偉在內將會係第四人。特首梁振英出席行政會議前被問及政府有否「跳船潮」時，指現屆政府比起「外邊民主國家」嘅政府，政治任命官員變動比率十分低。而政治任命官員離職，亦各自有原因。建仔副主席陳勇亦指徐英偉辭職唔係「跳船」，「而係由同一支艦隊，由一隻艦艇跳去另一隻艦艇。」
另外，商務及經濟發展局局長蘇錦樑與徐英偉同樣有建仔成員身份，當問及會否有一日好似徐咁重返建仔，蘇錦樑表明自己依家非常高興同開心，同公務員合作亦冇問題，強調政府工作較適合佢喎。
第一手消息請下載on.cc東網
