為咗慈善籌款，趙式和話會親身落場跑十公里。
趙世光同何琍琍嘅女兒趙式和尋日出席慈善跑嘅記者會，有備而來嘅佢甫到場即向記者話唔會透露有關胞姊趙式明懷孕嘅事。但佢就透露自己有行山嘅習慣，亦會支持朋友籌辦嘅慈善跑，喺三月八日仲會親身落場參加慈善步行。
趙式和笑言：「以前喺洛杉磯跑過十公里，喺一個鐘頭內完成，不過都差唔多十年前。而老公李承康間中有同我一齊行山，上次跑步佢就淨係拎相機同我影相，可能佢嫌我跑得慢唔同我跑。」咁有冇興趣挑戰三項鐵人賽？佢話：「我咁嘅年紀，跑十公里已經好滿意。」
六點起身偷空練跑
咁依家開始練跑未呢？佢坦言近日忙於搞畫廊嘅嘢，所以較少時間做運動，但透露自己每逢參賽前，都會特地喺早上六時起床，趁返工前做訓練。
第一手消息請下載on.cc東網
