仲記得舊年九月，一班立法會議員先至去咗芬蘭、丹麥同挪威訪問，事隔唔夠半年，班議員又要去德國外訪喇！早前德國政府透過駐港總領事館發信，邀請立法會議員喺三月一日至六日到當地參觀訪問，立法會秘書處尋日出咗代表團名單，共有九位議員成行，當中有四位喺舊年九月都去過芬蘭，半年出巡歐洲兩次，聽落都幾爽。
由於今次嘅旅費係由德國全包，認真吸引，所以聽聞今次嘅競爭亦非常激烈，最後花落身兼立法會議會聯絡小組主席嘅「卿姐」劉慧卿、李卓人、陳克勤、阿Paul謝偉俊、梁繼昌、郭榮鏗、葉建源、鄧家彪同Felix鍾國斌，其中卿姐、阿Paul、葉建源同Felix都去過芬蘭等地外訪。有份去嘅克勤就話今次係佢首次去德國，雖然同啲新春活動撞晒期，但佢都會照去不誤，因為要去睇吓人哋點樣喺民主制度下處理拉布喎。
第一手消息請下載on.cc東網
