蔣麗芸提醒女士們要把握機會「嫁住先」。
啱啱宣布今年四月卸任建仔中委嘅立法會議員Ann蔣麗芸，下嫁老公梁海明十幾年，至今依然恩愛如昔，雖然阿Ann成日強調自己係獨身主義者，但講到女性嘅人生大事，佢就放軟態度，話女士們都係目標為本比較好。即係點？佢舉例話，如果女士目標係三十歲嫁人，限期將至都搵唔到對象嘅話，惟有將就吓「嫁住先」。原來阿Ann除咗鍾意「袋住先」，仲鍾意叫女士「嫁住先」。
除咗結婚，年輕人仲潮興生涯規劃，政府亦積極鼓勵青年創業為將來打算，但阿Ann就提出「逆向」生涯規劃。佢話當年大學畢業前，已經希望六十歲準時退休，但同時想住千幾二千呎大宅，有車之餘仲要兒孫滿堂兼有工人服侍，每年仲要有閒錢去兩轉旅行添！為確保六十歲可以如期達標，佢更要求自己提早五年儲夠錢，六十歲有車有樓就肯定唔再係夢喇！
不過，佢貴為蔣家二小姐，以上要求基本上當年一畢業就達標九成，佢呢個生涯規劃不但夠晒「逆向」，仲相當離地，城中姊妺恨唔到咁多嘞！
第一手消息請下載on.cc東網
