譚樂文有信心JOOX會有錢賺。
騰訊出咗「國際版」免費聽歌app JOOX，對準國際市場。騰訊國際業務部香港及台灣辦公室總經理Norman譚樂文話，有信心JOOX會有錢賺，但就神神秘秘咁唔肯講有冇下載目標、付費用戶量同埋投資金額。
Norman話JOOX推出兩星期反應幾好，睇好業務發展。其實騰訊喺大陸做咗好多年聽歌app「QQ音樂」，因為版權問題同埋想本地化同國際化多啲，就設計咗JOOX打海外嘅市場。佢仲話香港係JOOX第一步，未來想打入東南亞市場。
JOOX啱啱先起步未有大宣傳，Norman都會諗吓好似其他聽歌app咁同電訊商合作，不過好似冇乜對象揀喎。3香港有KKBOX、csl.又有MOOV。Norman樂觀咁話合作都係傾番嚟嘅啫，依家都係等多啲人試用吓JOOX先啦。
下載JOOX係免費嘅，啲歌都係免費聽。但如果想download埋嚟聽，就要畀四十八蚊月費，唔係特別平。不過，依家仲可以有三十天免費試吓付費服務嘅嘢。
Norman仲話短期內都搞簽唱會或者小型演唱會，淨係exclusive畀JOOX用戶，唔知會唔會有韓星睇呢？咁就唔知喇，只係知唔會搞音樂頒獎禮。
第一手消息請下載on.cc東網
