設計圖片
佔領行動激化青年人更關心社會事務，亦令政府更關注青年問題同埋想辦法疏導佢哋嘅不滿情緒。早前都講過喺佔領行動後期，有網民表明有意參加年底嘅區議會選舉，挑戰多年都係來自動當選嘅建制派區議員。據聞呢班網民初步揀定東區、深水埗同黃大仙作為參選試點，仲講到明要狙擊因為反佔中而揚名嘅律師、建仔嘅黃大仙區議員陳曼琪，令佢唔可以好似以前咁，唔使做競選工程就可以自動當選。
鍵盤戰士搞組織唱衰
當佔領行動爆發後，陳曼琪代表潮聯小巴公司入稟向法庭申請旺角禁制令，要求重開旺角彌敦道一帶道路，之後又代表小巴公司聯同執達主任去旺角宣讀禁制令，一舉一動令佢迅速成為建制派風頭躉。不過，樹大招風，加上佢多年喺黃大仙正愛選區自動當選，咁就成為咗網民嘅目標，如果地區工作唔實淨，分分鐘輸埋個議席。
不過，為咗低調行事，加上唔想同任何政黨拉上關係，班網民最近成立名為「慈雲山建設力量」嘅地區組織，仲不時派義工落區派單張宣傳。由於佢哋資源同人手都不及一般政黨，據聞佢哋決定用民生議題攻擊陳曼琪，例如建仔○七年喺立法會通過公屋加租法例，佢哋就製作一批宣傳單張，寸爆建仔「扮嘢」反對加租係無恥，希望藉此攻擊同屬建仔嘅陳曼琪。
雖然網民未必搶到好多票，但睇嚟陳曼琪今次選舉都唔可以輕鬆連任，要打醒精神應戰嘞！
第一手消息請下載on.cc東網
