新任專員護廉潔 廉署萬勿放貪曾

新人事，新希望。新政府正式登場，全城注目，新任廉政專員白韞六履新，更加成為焦點。無他嘅，痛心特首曾蔭權爆出連串貪腐醜聞，搞到香港官場烏煙瘴氣，新專員自然任重道遠，全城睇實，叮！

嚟，聽吓白韞六點講先。佢話，公平廉潔係香港人嘅核心價值，佢對加入廉署呢個世界知名反貪機構感到榮幸，未來會秉承使命，公平公正，不偏不倚，致力維護香港廉潔。至於貪曾一案，佢就話不予置評。

大家聽完白韞六呢番話，會唔會覺得好感慨呢？無錯，廉署肅貪倡廉，以前的確打過唔少大老虎，但係近年打擊巨貪唔係綁手綁腳，就係軟手軟腳，被人質疑自廢武功。唔係咩？東方報業集團年初連環獨家踢爆曾商勾結，以權謀私，廉署立案四個月嘞，至今居然未見有任何進展，甚至一直拒絕向公眾交代詳情。究竟廉署係無秉承使命，放生貪官吖？定係把反腐劍已經生咗鏽，無力打大老虎呀？

白韞六走馬上任，未必咁掌握貪曾案嘅來龍去脈，太一叮建議佢重溫《太陽報》同《東方日報》嘅第一手報道，咁就可以一條龍、全方位掌握呢位特貪之首嘅貪腐罪行嘞，資料之多包佢睇天光都睇唔晒。你話嘞，如果一隻咁嘅貪腐大老虎最終逍遙法外，唔好話廉署塊招牌隨時摺得，香港嘅廉潔招牌恐怕都保唔住呀，叮！

嗱嗱嗱，唔係嚇你o架，廉署今年頭四個月接獲嘅貪污舉報比上年同期增加百分之四，當中涉及政府部門嘅多達三百六十幾宗，唔擔心就假。正如北大人話齋，子帥以正，孰敢不正？如果做阿頭其身不正，下面個個都做壞事啦！

咁啦，新官上任三把火，白韞六如果想肅清官場貪風，磢靚廉署招牌，等太一叮醒條好橋畀你，就係火速處理貪曾大案，畀香港人一個圓滿交代！貪曾歎盡海陸空，貪盡呢份工，已經成為官場貪腐嘅象徵標誌。廉署如果打下呢隻百獸之王咯喎，肯定可以收震懾群魔之效，而廉署嗰句「香港勝在有你同ICAC」嘅宣傳口號，先至可以理直氣壯唱落去o架，叮！

不過咁呀，廉署若然要打大老虎，就要快手嘞，事關貪曾一卸任即離港，已經滾水淥腳飛去外地，隨時由氣候逃犯變貪腐逃犯。白韞六，捉唔捉到貪曾，就睇你嘞，叮！