流會鬧劇演不完 九月選舉掃垃圾

世界難撈，如果搵到份工係人工高、福利好，返工奉旨遲到早退，心血來潮又可以玩失蹤，咁就發咯！嗱嗱嗱，香港真係有咁嘅超級筍工o架，就係做立法會議員嘞！

議員薪高糧準有目共睹，淨係睇佢哋夠膽死要求加一倍人工，就知喺香港做民意代表係幾咁有「錢途」啦。返工遲到早退偷懶蛇王，就更加唔使講，「三點不露」李國寶就係人辦中嘅人辦。講到曠工失蹤咯喎，一樣係議員特色、政客強項，呢嗱，又有真人示範嘞，叮！

立法會原定由尋日開始一連兩日舉行會議，處理積壓議案，點知再一次因為人數不足而流會收場。開會係議員嘅基本職責，唔去開會就係曠工，搞到流會更加係阻住地球轉，試問點對得住納稅人呀？連最基本嘅職責都履行唔到，為民喉舌又從何談起呀？

立法會流會浪費公帑，妨礙民生，所以咯喎，民主黨副主席劉慧卿急急補鑊，話向公眾致歉喎。民主黨缺席議員包括李華明、黃成智、張文光以及何俊仁。

議員慣性蛇王失蹤，立法會流會已經變成家常便飯，幾乎成為議事程序一部分。政客餐餐都話致歉，次次都話遺憾，結果餐餐重蹈覆轍，次次故態復萌。早前議會拉布戰造成流會，一個月唔到，蛇王議員再度集體曠工，如果係普通打工仔早就炒魷魚啦。

平日官員怠忽職守，議員例必大義，凜然口誅筆伐，立法會流會失職，咪罪加一等？所以話，由流會呢家嘢就清楚睇到，行政同立法機關根本就係五十步笑百步，一樣咁烏煙瘴氣。乜嘢為民喉舌，乜嘢為民請命，全部同曾蔭權嗰塊「福為民開」嘅破爛招牌一樣，呃飯食o架咋！

嗱嗱嗱，行政立法真係沆瀣一氣o架。貪腐醜聞纏身嘅貪曾無做好佢份工，主政七年禍港殃民，而立法會保皇黨就不務正業，聯手阻撓對貪曾嘅不信任動議。叮佢個鎯鎯，唔怪得有人話，立法會根本就係垃圾會，入面充斥嘅都係社鼠城狐，唔係是非不分保皇護貪，就係苟且徇私白食公帑。

立法會淪為垃圾會，大家係咪好想將呢班政客政棍一腳踢晒落垃圾桶呢？九月立法會選舉好快就到，係時候秋後算帳嘞，大家記住運用手中選票，掃走班議會垃圾，叫佢哋永遠「失蹤」，叮！