洋校送錢又送地 港校迫遷話之你

中國人嘅劣根性係崇洋媚外，過去係咁，依家又係咁，內地係咁，香港亦係咁。正如慈禧太后所講，「寧贈友邦，不予家奴」吖嘛！

嗱，香港又有一個現成例子嘞。話說浸會大學○五年以每月五萬蚊嘅優惠價租用啟德前皇家空軍俱樂部，開辦全港唯一嘅視覺藝術學院，本來相安無事，點知產業署年初突然通知校方，今年九月起加租五倍，每月三十萬！

當局飛擒大咬，擺明迫遷啫！浸大無計，焗住大屋搬細屋，暫時租一半校舍，日後逐步將視藝學院搬返九龍塘校園。不過咁，由於浸大本身校園空間不足，唔少同學擔心學習會受影響。

本港視覺藝術發展長期滯後，同南韓、新加坡以及內地相比，直頭輸足九條街。當局口口聲聲推動教育及創意文化，甚至大拿拿斥資二百幾億搞西九文化區，但對本港唯一嘅視藝學院唔支持不特止，仲大幅加租迫遷，趕盡殺絕，簡直係倒行逆施。

話時話嘞，繼續以優惠租金出租校舍畀視藝學院，培育人才，使得幾多錢吖？先唔講庫房水浸，政府大把錢，只要高官外訪坐少啲頭等機位，住少啲總統套房，已經夠冚租金有餘喇。

最離譜就係，同樣辦教育，待遇竟然中西有異、華洋有別。好似大嶼山國際小學咁，除咗每年一蚊嘅特惠租金之外，仲可以享受各種優惠；仲有薩凡納設計學院，當局寧願免租將歷史建築北九龍裁判署舊址交畀呢間牟利嘅美國私立學校，都唔肯交畀八和會館推廣粵劇藝術，咁仲唔係厚此薄彼，崇洋媚外？豈有此理！

無計喇，港英餘孽飲慣洋奶，見到外國人就腳軟，唯恐服侍不周吖嘛。講到崇洋媚外，港府賤價批地畀哈羅香港國際學校都算經典咯。面積四十萬平方呎、市值高達十四億元嘅屯門優質海景地皮，代價只係一千蚊咁大把，等同免費使用。試諗吓，如果哈羅唔係洋學校，唔係同煲呔曾有千絲萬縷關係，港府會唔會咁大方吖？

洋校送錢又送地，港校迫遷話之你。慷納稅人之慨資助外資學校，擺明車馬向洋人輸送利益，港英餘孽嘅醜陋嘴臉，十足十係慈禧太后。洋奴當道，是非顛倒，港人遲早同呢班賣港求榮嘅「現代老佛爺」算帳，叮！