貪腐醜聞日日新 香港之恥煲呔曾

煲呔曾就快落台嘞，有冇人記得佢嘅六大優勢產業係乜東東呀？嗱，如果記唔到，係正常o架，事關六大產業至今無影無蹤，搵鬼記得咩？等太一叮提下大家，六大產業其中一項係創意及文化產業，其實，煲呔曾一直都以身作則o架，佢嘅貪腐醜聞層出不窮，貪腐手法創意無限，真係你諗都未諗過，想都想唔到o架，叮！

嗱嗱嗱，講到貪腐花樣創新，煲呔曾認咗第二，真係無人敢認第一o架。佢唔止貪得多、貪得狼，仲貪得刁鑽、貪得創新，真係唔到你唔服。呢嗱，煲呔曾又有貪腐獨家發明嘞，等太一叮為大家介紹下啦。

第一項曾氏貪腐新招，係碌卡攞着數！煲呔曾貪盡全世界，五年來唔止外訪住宿開支超過二百萬元，仲被質疑乘機用私人信用卡簽帳墊支房租，以賺取信用卡積分。咪睇小呢招呀，如果二百幾萬全數碌卡，所得積分足以換取一萬元禮券，用嚟去超市購物又得，去買電子產品亦得，得咗！

第二項曾氏貪腐發明，係借瘋狂外訪私吞航空公司飛行里數！小數怕長計，煲呔曾用公帑周遊列國，搭飛機賺取嘅飛行里數獎賞超過三十四萬里，夠換十一張香港來回東京嘅經濟客位機票o架嘞，問你服未！

至於第三項曾氏貪腐專利，犀利咯，就係「篤鼻哥」睇霸王展覽！煲呔曾被審計署踢爆豪遊外訪，照樣死性不改，濫用特權威逼文化博物館提早開館，畀佢得以獨霸展館欣賞畢加索名畫四十分鐘。至於廿蚊入場費，佢梗係詐傻扮懵唔畀錢啦。叮佢個鎯鎯，堂堂港府阿一，連廿蚊都唔放過，貪曾之名果然實至名歸！

其他貪曾系列嘅貪腐招數一樣無奇不有層出不窮，傍住富豪黐飲黐飲黐大屋固然唔在講，肥雞菜心跑步機照樣唔放過，連貪都貪得寧舍有創意。如果香港發展「貪腐創意產業」，貪曾嘅貢獻肯定無出其右。

煲呔曾貪腐醜聞日新又新，簡直係香港之恥。電台聽眾講得啱，貪曾令香港蒙羞，必須引咎辭職！莫講話貪曾仲有一個月任期，就算剩番一秒鐘，都要佢落台，如果唔係，本港嘅廉潔形象就玩完㗎嘞，叮！

即係咁，立法會即將向貪曾提不信任動議，家陣連工聯會都叫佢落台，睇怕佢呢鋪都走唔甩喇啩。嗱，保皇黨唔好再盲目護貪呀，民意不可違，九月立法會選舉實有報應o架，叮！