網上無牌賣蛋糕 盲官該被掟蛋糕

官場送瘟神，全港皆醒神，食衞局局長周一嶽盛傳冇得留低，消息一出，全城鼓掌。好咯，香港人終於有啖好食咯！

不過咁呀，大家七月一日之前都唔好掉以輕心，事關周一嶽一日未走，食環署一日都由佢領導，市民就一日都冇安樂茶飯食。呢嗱嗱嗱，莫講話毒菜毒魚毒牛肉呢條港式畸形食物鏈，家陣就連蛋糕都可能出事，問你怕未？

係咁嘅，網絡威力無遠弗屆，近年網上購買蛋糕愈來愈流行，連帶無牌蛋糕店亦如雨後春筍，近三個月已經由二十多間增加至五十多間，其中唔少仲係打住「蛋糕教室」嘅招牌，掛羊頭賣狗肉。

見到無牌兩個字，太一叮即時諗到八個字：欠缺監管，良莠不齊。蛋糕店無牌經營，工場係咪衞生唔知，製作係咪合規格唔知，冷藏設施係咪合乎標準亦都唔知。唯一知道嘅，係佢哋無公司地址，就算出事都追究無門。

醫學界警告，蛋糕如處理不當，好易變成病菌溫床，食咗輕則屙嘔肚瀉，重則食物中毒。無牌蛋糕店氾濫，市民去生日派對食蛋糕，分分鐘變入醫院洗胃。

叮，無牌蛋糕店雖然匿喺虛擬世界，違規售賣蛋糕係鐵一般嘅事實，法例無監管嘅咩？當局無巡查嘅咩？有係有，不過統統得個樣，有法等如無法，巡查更加虛有其表。

記者親身直擊一間所謂蛋糕教室，兩百平方呎面積堆滿雜物，職員一手喺雪櫃取出蛋糕交畀訂購顧客，好明顯有人違法經營。哈，點知食環署職員就係盲嘅，巡查完居然話無發現有人無牌經營喎。

業界踢爆，曾經向食環署舉報無牌蛋糕店，食環署官僚居然就咁着住制服上去，問人哋係咪賣蛋糕，咁都捉到人嘅話，呢個世界就冇賊啦。立法會議員直斥食環署態度馬虎，質問署方：「連放蛇都唔肯，點會成功？」

叮！所以太一叮成日懷疑，食環署根本一直存在喺虛擬世界入面，所謂監管，根本係唔存在嘅，所謂巡查，更加係幻象嚟嘅啫。如果唔係，食環署就係實實在在嘥緊納稅人米飯嘅食塞米！

橫掂無牌蛋糕店無王管，咁啦，大家不如訂番兩個留畀周一鑊同食環署署長梁卓文，不過唔係請佢哋食蛋糕，而係下次見到佢哋時，用盡力掟過去，叮！