跪低仲要死撐 腳痛不如早抖

候任特首梁振英兌現競選承諾，提出雙非孕婦來港產子零配額，撥亂反正，獲得唔少掌聲。食物及衞生局局長周一嶽眼見形勢比人強，焗住跪低，即時宣布唔再同私家醫院商討明年雙非配額。

不過咁，周一鑊除咗卸膊非常在行之外，原來補鑊一樣咁耍家。呢，佢居然為自己邀功，話兩個星期前已經主動向CY提出雙非配額問題，講到「零配額」好似係佢提出咁，面皮直頭厚過電話簿。

最搞笑就係，周一鑊唔認跪低，仲懶咁風趣話「自己膝頭哥做過手術，唔係咁容易跪低」喎，簡直九唔搭八，不知所謂。其實，佢身為問責局長，長期無所作為，搞到雙非問題七國咁亂，呢次被迫轉軚，點只下跪，直頭係仆直喇，咁都仲要死撐，問你服未。嗱，既然佢自認膝頭有事，為人為己，唔好阻住個地球轉咯，不如早抖，名正言順腳痛落台，自動消失罷啦！

正所謂男兒膝下有黃金，如果做官以民為本，問心無愧，使乜跪低吖。短短幾年間，雙非嬰兒由每年幾百人，增加到家陣每年四萬幾人，造成呢種不可收拾嘅局面，曾蔭權政府後知後覺，無所作為，敷衍塞責，固然罪無可恕，而周一鑊扮晒鴕鳥，對雙非危機視而不見，解決問題一拖再拖，更加難辭其咎。

話時話吖，周一鑊上任以來，渾渾噩噩，一事無成，做邊瓣衰邊瓣，又點只雙非搞到一鑊泡。呢，公立醫院服務質素每況愈下，醫療事故無日無之；骨灰龕位嚴重短缺，違規經營遍地開花；仲有食物安全問題不絕如縷，等等。一句講晒，市民衣食住行、生老病死，統統畀佢搞到亂晒龍，叮！

話口未完又多一單喇。審計署報告踢爆，醫管局推出嘅公私營醫療協作計劃缺乏有效規管，好似白內障手術計劃咁，運作已經遠遠超過試驗期，但幾時採用長期服務形式仲係未知之數，「耀眼行動」淪為「篤眼行動」。

總而言之，周一鑊尸位素餐，如果留任下屆政府，只會佗衰家，繼續禍港殃民。計太一叮話齋，呢類低能力、低承擔、低民望嘅「三低局長」，早走早着，叮！