收單非自打嘴巴 周一嶽跪完再跪

食物及衞生局局長周一嶽話膝頭哥做過手術，唔係咁容易跪低喎，話口未完又腳軟，今鋪唔止跪低，直頭係趴低，趴到貼地。

私家醫院同意明年停收雙非孕婦，多間私家醫院將為單非孕婦提供預約分娩服務。周一嶽公布消息嗰陣，扮晒「功臣」，乘機抽水話，單非孕婦獲床位分娩係社會共識喎。對自己曾堅持一刀切處理單非同雙非孕婦隻字不提，好似雙非問題出現轉機係佢嘅「功勞」咁，真係唔知醜字點寫！

係人都知，雙非問題之所以搞到天怒人怨，曾蔭權虛應故事固然要負起最大責任，周一嶽渾渾噩噩同樣難辭其咎。問題瀕臨爆煲，佢哋冇尋求解決辦法不特止，仲要越俎代庖，同私家醫院商討明年雙非配額。候任特首梁振英忍唔住大聲喝止，話明私家醫院明年接收雙非孕婦應該係零配額，而且唔保證明年出生嘅雙非嬰兒有居港權，周一嶽先至焗住認衰，話會配合下屆政府喎。

雖然佢死撐話冇跪低，但事隔幾日又再雙膝落地，私家醫院明年停收雙非孕婦之餘，亦承諾將單非孕婦分開處理。跪完可以再跪，周一嶽不如改名「周一跪」，一周一跪，咁香港醫療痼疾就有機會解決嘞，叮！

當初擇惡固執，以資源不足、技術上難以區別單雙非為由，歧視港人內地妻子，拒絕靈活處理；家陣以今日之我打倒昨日之我，雖然係後知後覺，但遲做好過唔做。問題係，點解候任特首一聲令下，渾渾噩噩嘅周局長突然轉死性呢？

查實，梁振英正籌組新班子，周一嶽早就開到聲，明示暗示有意留低，既然候任特首喝停雙非孕婦來港產子，佢聞到𤓓味即刻補鑊，無非都係想繼續做官嘅啫。

嗱嗱嗱，周一嶽剩官愛作戰，主動向未來老闆拋媚眼，但梁振英要唔要佢，就係另一回事喇。係人都知，周一嶽身為問責局長，領導無方，劣評如潮，醫療系統畀佢搞到烏煙瘴氣，醜聞不斷，對雙非問題更加係坐視不理，下屆政府收咗佢，即係收咗一個計時炸彈，真係博唔過。

民意昭昭不可違，倒行逆施必自斃。計太一叮話齋，下屆政府除咗要盡快拆除雙非炸彈，仲要徹底清除尸位素餐嘅庸官，周一鑊想留低，問過市民先啦，叮！