保皇黨助紂為虐 護貪曾禍港殃民

曾蔭權連串貪腐醜聞曝光，香港廉政一鋪清袋，倒曾浪潮席捲全城。群情洶湧之下，有立法會議員對煲呔曾提出不信任動議，點知建制派議員居然人鬼不分，是非顛倒，導致動議被否決，貪曾喺保皇政客全力護航之下，暫時避過一劫。

不過咁，出得嚟行，預咗要還。立法會議員冇為市民主持正義不特止，仲自甘墮落，助紂為虐，遲早必定要為自己嘅行為付出代價。人在做，天在看吖，如果保皇政客以為包庇貪官乜事都冇，咁就大錯特錯嘞，今年九月就係立法會選舉，正所謂票債票償，放生貪曾呢筆帳，選民到時一定會同佢哋算清算楚o架！

其實，過到初一，未必過到十五，煲呔曾今次靠保皇政客護航僥倖過咗骨，但倒曾浪潮一浪接一浪，有議員準備提出彈劾動議，煲呔曾雖然時日無多，但剩低嗰兩個幾月睇怕有得震冇得瞓。不可不知，呢次將會係香港有史以來首次有行政長官被彈劾，煲呔曾又創造咗一項歷史，果然係一貪成名，遺臭萬年咯。仲有吖，除咗立法會不信任動議同彈劾動議，廉政公署亦正調查緊，喺天羅地網之下，試問貪曾匿得去邊？

話時話，煲呔曾上台七年，搞到香港七國咁亂，官場烏煙瘴氣，除咗佢本人同富商勾勾搭搭，「貪遍省港澳、歎盡海陸空」，前後兩任政務司司長亦分別捲入貪腐及僭建醜聞，香港廉政蕩然無存，唔止淪為國際笑話，連中央政府都覺得冇晒面。

呢，候任特首梁振英前排上京接受任命，北大人耳提面命要佢做人、為政都要清廉。正所謂，聽話聽聲，鑼鼓聽音，三歲細路仔都知道，呢番話根本就係講畀煲呔曾聽，難為佢仲喺度詐傻扮懵，甚至否認自己係跛腳鴨添，簡直面皮厚過牛皮，問你服未。

宜將剩勇追貪曾，不可沽名誤香江。北大人用「沉甸甸」形容候任特首嘅責任，真係一啲都冇講錯。煲呔曾害人害物，除咗留低一個千瘡百孔嘅爛攤子，而且摧毀咗香港嘅廉潔文化，下屆政府唔單止要撥亂反正，穩中求變，仲要徹查貪官，重建廉政，責任真係沉甸甸o架。一句講晒，「香港和珅」一日未受到正義嘅審判，市民對港府廉政就冇信心，貪官不除，港無寧日吖，叮！