毒膠囊殺入香港 毒膠官靠害市民

有請兩位太一叮長期賓客，食衞局局長周一嶽同衞生署署長林秉恩！實在令人忍無可忍，太一叮今日一定要叮爆佢哋嘅囊囊！

大家冇眼花，係叮爆佢哋嘅囊囊。事關呢對官場孖寶嘅最新靠害市民事件，就係致癌毒膠囊。

上月中，內地揭發無良奸商以重金屬超標嘅皮革廢料製造藥用膠囊，本報搜羅市面上十款膠囊藥物攞去檢驗，居然驗出一半樣本含有重金屬鉻，其中一個樣本更加超標四十倍！全靠本報踢爆事件咋，衞生署先至補鑊抽查藥物，證實該批次藥物重金屬超標。

叮！重金屬鉻好毒o架，誤服輕則影響肝腎功能，重則致癌，內地專家直指「毒害遠超過三聚氰胺」。毒膠囊流入香港，當局懵然不知，把關失職，你話係咪靠害吖！

把關不力都算，最離譜嘅係，毒膠囊曝光之後，衞生署繼續翹埋雙手唔做嘢，求其翻查過內地毒膠囊藥物冇喺香港註冊就當冇事。就算本報追問抽驗問題，衞生署依然堅稱冇發現註冊中成藥含有鉻，然後關人個關。

叮你個囊囊！你話周一鑊同林秉恩邊係做嘢o架！內地毒膠囊氾濫，香港必難獨善其身，呢個常識三歲細路仔都知啦，佢哋居然闊佬懶理，乜都唔做，你話係咪食錯藥吖？事實再次證明，周一鑊同林秉恩極之渾噩，返工只帶住一具硬膠製皮囊，係冇腦冇心肝冇靈魂嘅。

林膠官尋日仲死撐，話本港註冊中成藥有近萬種，逐一化驗不可行。該署家陣要求藥廠申報膠囊來源，如來自內地，就要自行提交化驗報告確定符合標準。

真係膠膠地，按照呢套膠官理論，藥品種類多就唔使驗，咁香港仲要衞生署嚟做乜？依家講緊藥物呀，唔通真係要食死人，你哋先至會緊張，林膠官？

即係咁，大家從今次事件好清楚睇到，就係傳媒第四權嘅重要性。如果今次唔係本報發揮第四權監察作用，毒膠囊襲港唔會迅速曝光，後果真係不敢想像。

所以話啫，香港可以冇咗乜都得，就係唔可以冇咗傳媒第四權、冇咗新聞自由。尤其正義傳媒《太陽報》同《東方日報》，秉承為民喉舌精神，繼踢爆曾蔭權連串貪腐醜聞之後，今次又揭露毒膠囊之禍，真係日出東方耀香江，妖魔鬼怪皆現形o架，叮！