庸官瘀血留低 遲早痛風跪低

政治無奇不有，真係唔到你唔信。好似食物及衞生局局長周一嶽咁，無論能力、承擔定係民望，統統衰到貼地，好多人以為「眾望所歸，冇得留低」，下屆政府一定冇佢份，點知好可能只係一場誤會嘅咋。

政壇盛傳，呢個「三低局長」有機會入閣梁振英管治團隊喎，但由於佢嘅民望實在太低，留任現職機會等於零，最大可能係出掌勞工及福利局。係人都知，周一嶽恨留低恨到出晒面，為咗賴死唔走，小動作多多，如果傳聞屬實，佢就恨到喇，難為市民未來幾年仲要對住佢，真係哭笑不得。

令人莫名其妙嘅係，周一嶽出晒名「每周一鑊」，撞板多過食飯，跪低多過企起，誠信同形象早就破產，CY冇理由唔知，點會畀佢留低呢？

唔係冤枉佢，周一鑊渾渾噩噩，管轄嘅範疇冇樣搞得掂。呢，公立醫院亂七八糟，醫療事故無日無之；骨灰龕位嚴重短缺，違規經營遍地開花；雙非問題一鑊泡，引致天怒人怨；至於食物安全問題咯喎，更加烏龍百出。總之一句講晒，港人衣食住行、生老病死，統統畀佢搞到亂晒大龍。

最離譜仲係，周一鑊知法犯法，加入煲呔曾僭建黨，被踢爆非法將自己豪宅嘅露台圍封，室內面積多咗近二百呎。嗱，屋宇署尋日證實有關工程屬僭建，並正式發出清拆令，呢啲咪叫鑊鑊新鮮鑊鑊甘囉。所以話，畀周一鑊留低，套用內地講法叫「帶病轉崗」，盞佗衰下屆政府，博唔過o架，叮！

話時話，CY喺競選政綱話要「穩中求變、適度有為」，市民期待新特首可以撥亂反正，以新人事、新面貌、新作風出現。點知新政府仲未正式上台，負面新聞就不絕如縷，尤其係容許庸官留低，更加令人百思不得其解。

除咗無德無能嘅周一鑊，被傳留任嘅仲有年年估錯數、公認「史上最廢財爺」嘅曾俊華。一個渾渾噩噩，一個不學無術，呢對廢柴孖寶留低，新政府想有運行都幾難。

正所謂，一朝天子一朝臣。新政府上場最緊要清除瘀血，好似鬍鬚曾及周一鑊呢啲庸官，一個「廢」字概括晒，唔知新政府究竟用嚟做乜。嗱，咪話太一叮唔提醒，庸官當道，就算新政府唔淪為跛腳鴨，都隨時痛風發作，寸步難行嘅咋，叮！