康體設施無王管 亡羊補牢何太遲

如果話人生如球賽，咁球場顯然就係官場喇。點解？因為只要夠賴皮，就算生人霸死地，霸住個球場玩拉布，都冇人吹得佢哋脹。

嗱嗱嗱，大家咁聰明，係咪已經估到太一叮想講乜呢？冇錯，就係康文署康體場地長期被濫用嘅問題，呢樣算得上係官僚賴皮嘅經典之作o架。

康文署宣布，市民以後電話預訂康體設施有新安排，必須三日前電話預訂，而且至少喺使用前一日繳費作實。康文署官僚平日懶到出汁，點解忽然推出咁嘅新猷呢？咪為咗補鑊囉。

係人都知，康文署管理不善，轄下康體設施好似羽毛球場、網球場同足球場，經常被人電話預訂後「甩底」，造成資源嚴重浪費。最離譜嘅係，有人甚至將預訂嘅設施公然炒賣圖利，簡直無王管。康文署依家規定電話預訂要繳費，算係遲來嘅補鑊，至少令習慣訂場甩底嘅賴皮人士識得收斂，總算好過冇喇，但究竟可唔可以止到咳，仲係未知之數。

其實，康體設施被濫用，唔係今日至有，審計署同申訴專員已經多次炮轟有關問題，康文署拖到家陣至做嘢，足足慢咗幾拍，其懶散程度可想而知。

係人都知，康文署轄下嘅康體設施係香港人嘅公共財產，港產官僚管理粗疏，把關失職，搞到「有場無人用，有人無場用」，何止浪費公共資源，仲係對其他使用者唔公平。試諗吓，如果係康文署官員嘅物業，佢哋會唔會咁心不在焉吖？

講開又講，康體設施被濫用，除咗甩底嘅問題要處理，炒賣問題更加要杜絕。咪話太一叮踢爆，康體設施被人炒賣，根本就係因為康文署有法不依，執法不嚴，先至被人有機可乘嘅啫。

正所謂，見微知著，康文署管理亂象叢生，就係港府施政混亂嘅縮影，唔好話康體場地被霸佔，元朗官地都被人霸佔咗十八年喇，問你服未！

唉，港府無能，連管理幾個運動場都搞到亂晒大龍，仲點管好香港吖。好彩超級賴皮友曾蔭權霸住官場七年，終於係時候執包袱離場，希望下屆政府撥亂反正喇，叮！