香港搵食難 父親唔易做

又到父親節喇，為人父者，此時此刻真係百般滋味在心頭。香港生活壓力大，做人難，做父親更難，做個好父親簡直係難上加難。

呢，一項有關父親喺子女心目中地位嘅調查發現，近八成受訪者認為，好父親首要條件係有足夠經濟能力照顧家庭。換句話講，無論港爸幾辛苦幾搏命都好，如果一家人生活捉襟見肘掹掹緊，呢個一家之主就被認為失敗，你話父親難唔難做吖。

有人話，子女將金錢物質當成愛嘅表現，會養成依賴父母習慣，做人缺乏責任感喎。話就係咁話啫，子女唔靠父蔭，自力更生，積極上進，做家長嘅梗係飲得杯落喇，問題係，現實社會邊有半斤八両咁理想吖。

大家都知，香港回歸十五年，港府一事無成，搞到經濟停滯不前，貧富差距愈來愈大，社會上流機會愈來愈少，年輕人靠自己努力成功嘅希望愈來愈渺茫。尤其係經濟條件差嘅家庭，子女好明顯已經輸喺起跑線上，自力更生邊有咁易吖。

所以話，將經濟能力列為好父親嘅首要條件，唔可以怪子女市儈，淨係講金唔講心，佢哋只不過講出社會現實啫。

無獨有偶，另一項調查發現，近半受訪爸爸感到目前壓力大及過大，而壓力來源正正就係經濟問題；亦有調查顯示，五成受訪者覺得自己嘅家庭並唔開心。嗱，呢啲咪叫貧賤家庭百事哀囉！

講真，有頭髮冇人想做癩痢，做父母嘅邊個唔愛惜自己子女？邊個唔想改善經濟條件做個好父親？可惜，理想還理想，現實還現實，今時今日唔少港爸港媽感到有心無力，呢啲唔係佢哋嘅錯，而係現實社會實在太殘酷。

唉，曾蔭權治港七年，無德無能，施政乏善可陳，香港畀佢搞到一鑊泡，樓價飆升，通脹高企，百物騰貴，柴米油鹽樣樣都升，生老病死樣樣都難。嗱，公務員就話先天下之樂而樂啫，普通打工仔連侍產假都冇，試問為人父親有乜法子唔壓力大吖。

一句講晒，煲呔曾治港，市民冇希望。好在貪曾就快執包袱走人，新政府即將上場，希望梁振英可以撥亂反正，除咗將經濟個蛋糕做大，最緊要將蛋糕分好，令更多父親可以做個合格港爸喇，唔該！