貪腐僭建知多少 官官相衞何時了

大家信唔信有七年之癢呢回事？其實，除咗婚姻有七年之癢，官場都有o架，唔到你唔信。嗱，曾蔭權爵士上台七年，佢自己固然貪威識食，連兩位前政務司司長許仕仁及唐英年亦分別捲入貪腐及僭建醜聞，呢啲咪就係貪曾治港嘅七年之癢囉！

正如前廉政專員羅范椒芬話齋，過去七年，港府最高層三名官員齊齊出事，呢啲醜聞以前從未發生過，證明現時制度絕對有問題。

冇錯嘞，現時制度最大嘅問題就係寬上嚴下，官官相衞。煲呔曾當正自己係土皇帝，自訂「無字天書」接受富商款待，黐飲黐食，而且濫花公帑周遊列國，唔貴唔住。但另一方面，普通公務員就要嚴格遵守各種條例及指引，稍為行差踏錯，隨時受到嚴厲懲罰。

呢，有位基層公務員未經批准借五百元，被判七十小時社會服務令及被革職；有位退休警長喺澳門接受價值兩萬元嘅免費住宿，被判入獄十五個月；有位水務署助理督察收受二千元月餅禮券，被判監三十六個月。老實講，呢啲行為同煲呔曾接受富商豪華款待，搭私人遊艇，坐私人飛機，簡直係小巫見大巫。公務員違規要坐監，而煲呔曾大貪特貪就逍遙法外，咁仲唔係雙重標準？

講起雙重標準，港府對付僭建大細超，更加係離晒大譜。普通市民僭建，當局話拆就要拆，絕對冇人情講，而高官權貴僭建，當局就隻眼開隻眼閉，即使畀傳媒踢爆，亦慢條斯理，拖得就拖。好似唐英年九龍塘豪宅僭建「地下王宮」咁，證據確鑿，冇花冇假，當局聲稱要進行調查，連廉署亦介入添，但幾個月過咗去，依家仲係無聲無息，究竟查成點呢？幾時採取行動吖？當局完全冇交代，睇怕又想大事化小，小事化了。話時話，如果僭建地下王宮嘅唔係唐唐，而係普通市民，早就接咗清拆令，仲隨時被檢控添。唔怪得新界鄉紳條氣唔順喇，當局執法大細超，唔興就假！

貪腐僭建知多少，官官相衞何時了。規管利益衝突，特首一套，普通公務員一套；對付僭建，高官權貴一套，普通市民一套，煲呔曾禍港七年，搞到廉政及法治蕩然無存，簡直係香港之恥。計太一叮話齋，善有善報，惡有惡報，呢筆帳市民一定會同貪曾算清楚，希望立法會嗰班保皇政客唔好再玩包庇，否則連佢哋都唔掂吖，叮！