貪曾醜遍全世界 影衰香港真丟架

多得曾蔭權，香港個朵愈嚟愈響。嗱，家陣全世界都知，香港嘅貧富懸殊獨步天下、樓價租金冠絕全球、空氣污染無出其右……咁都唔止呀，依家仲多一樣威水史，就係香港出咗個「第一貪官」，你話醜唔醜吖？

貴為「香港第一貪」，貪曾早就臭名遠播，名震中外。呢嗱，佢又做咗國際新聞人物嘞！《華爾街日報》發表詳盡報道，為呢位「痛心特首」嘅七年任期蓋棺論定，話呢個英國爵士晚節不保，醜聞纏身之下落台，實在令人始料不及。醜事傳千里，貪曾淪落係咪令人始料不及好難講，但係香港畀佢影衰晒，呢樣就肯定嘞，叮！

《華爾街日報》都算畀足面貪曾，詳細介紹佢嘅醜聞。由傍住富豪貪盡海陸空，到民望評分跌到嘭嘭聲；由揮霍公帑外訪遊埠，到任內施政一事無成，一一盡錄，巨細無遺。聽講北大人對貪曾嘅總結評價不知如何落筆，不妨參考吓呢篇報道吖，應該可以搵到唔少靈感。

叮佢個鎯鎯，香港四海昇平、繁榮安定成為國際新聞就話好啫，因為一個貪腐特首而變成環球焦點，咁就唔多妙咯。試諗諗，如果你係外國人，會對香港有乜觀感？一係認為香港貪官橫行，一係以為香港係不適宜人類居住嘅妖獸都市囉。

唔係嚇你o架，貪曾主政七年，香港烏煙瘴氣，空氣污染持續惡化，樓價飆升高不可攀，貧富差距世界第一，經濟增長慢過龜爬……呢啲《華爾街日報》全部有報道，外國人睇到仲唔掉頭走呀？香港由昔日漁村小島，變成東方之珠，一切得來不易，如果畀一個貪曾搞到蒙污蒙臭，咁就弊弊都無咁弊！

貪曾醜聞成為國際新聞，唔係第一次o架嘞。英國《泰晤士報》早前亦詳細報道過「曾商勾結」醜聞，話佢接受富豪款待同超豪外訪，有損香港作為全球最廉潔金融中心嘅聲譽，動搖國際對香港廉潔政府嘅信心。

講到呢度，太一叮諗起一句話，一粒老鼠屎搞臭一鍋粥。廉潔法治唔止係香港嘅核心價值，更加係繁榮穩定嘅基石，一定唔可以畀貪曾一個人拆咗香港嘅廉潔招牌！點樣補救呢？好簡單，廉署揸正嚟做，就算貪曾七月一日落咗台，都要秉公處理，秋後算帳又好，秋前行動又好，總之要將呢隻大老虎繩之以法，還香港廉潔清譽。話時話，日前有人送咗個杯墊畀貪曾，可能就係畀佢去廉署飲咖啡用啩！

太一叮提醒廉署，立法會保皇黨因為保曾護貪，成為人民公敵，廉署唔好變「保皇署」呀，唔係嘅話，市民一樣唔放過你哋，叮！