黑灰白：高人獨白

間屋十年前買落，雖然間地下室同三幾個棚架好似建築圖則上唔多見到，不過隔籬左右都係咁，應該無事。博一博，有事至算，無風無浪過咗十年。

舊年煲呔曾自己非法封騎樓手腳唔乾淨，害人害物，拉人落水，要人自己檢查後欄；其實呢類新聞賣三兩日自然玩完，何必自揭瘡疤？況且間屋睇極都唔覺有僭建，博多一博，費事無風起浪，打亂我嘅鴻圖大計。

報名嗰陣有人叫我做足全身檢查兼消毒，畀人見到嘅都已經做足工夫，見唔到嘅就無謂搵嘢嚟做，盞畀人口實，總之我真係唔覺自己間屋有問題，間屋就自然無問題o架啦，問心無愧就算。後來報紙幫我撩起阿糖間屋嘅大型僭建，自然要踩多幾腳。原來力度好大，其他黑材料都唔使用，已經搞到成壇散晒。返到屋企見到間地下室，睇睇吓又真係好似有啲唔多妥，但嗰陣已經風頭火勢，如果企出嚟話自己間屋都有僭建，等如披蓑衣救火，前功盡廢，只好再博多一博，登咗位至算。

日前報館打電話嚟，話間屋單嘢已經守唔住，班細路作反，話無理由咁正嘅新聞唔畀出，要漏料畀隔籬報喎。真係晴天霹靂，啲花棚都係濕濕碎，快快手手拆咗佢，道個歉應可了事，唯獨間地下室就可能吟詩吟唔甩，自己引爆都唔掂。如果畀人揭發我仲可以詐唔知，事關我唔係嗰行專業，點知邊件僭建邊件唔僭建。惟有頂硬上，又再博一博。

第二日報紙爆我兩個花棚違法，我就乘機邀請屋宇署嚟檢查，以示清白。屋宇署果然連間地下室都搵埋出嚟，事情通晒天，我唔使自爆，幾大都話自己實不知情，仲話邊有人咁傻，搬起石頭打自己腳，叫人查自己？

明知山有虎，偏向虎山行，如無過人膽識，如何能當一區之首！嘿嘿！